QR KKM Kóliktik baqylaý komıteti sheteldik kólik quraldaryn tasymaldaý tártibin tekserýden ótkizýde
ASTANA. 6 jeltoqsan. QazAqparat - 2011 jylǵy 16 qarasha men 16 jeltoqsan aralyǵynda Qazaqstan Respýblıkasy Kólik jáne kommýnıkatsııa mınıstrliginiń Kóliktik baqylaý komıteti sheteldik kólik quraldarynyń ulttyq zańnama talaptary men halyqaralyq kelisimderdiń normalaryn oryndaýyn baqylaý jóninde kúsheıtilgen is-sharalardy júzege asyrýda.
Bul týraly vedomstvonyń baspasóz qyzmetinen málim etti.
Halyqaralyq kelisimderge sáıkes, Qazaqstan Respýblıkasynyń aýmaǵy boıynsha ótý, sondaı-aq úshinshi elderden tasymaldardy júzege asyrý úshin shetel tasymaldaýshylarynyń ruqsat qujattary bolýy tıis.
Atalǵan quqyqtyq normalar otandyq tasymaldaýshylardyń múddelerin qorǵaýǵa, dálirek aıtqanda tasymaldardy tek shetel tasymaldaýshylarynyń oryndaýyna jol bermeı, sonymen birge otandyq tasymaldaýshylarǵa da tasymaldardy júzege asyrý múmkindigin berýge baǵyttalǵan.
Osylaısha, kóliktik baqylaý beketterinde halyqaralyq tasymaldardy tıisti ruqsat qujattarynsyz júzege asyrǵany úshin buzýshylyqtardy joıǵanǵa deıin birneshe sheteldik kólik quraldary ustaldy (Serbııadan - 2, Nıderlandydan - 5, Belarýstan - 5, Germanııadan - 1).
Sonymen qatar, is-sharalar bastalǵannan beri sheteldik tasymaldaýshylar tarapynan 200-den astam zań buzýshylyqtar tirkeldi. Sonyń ishinde, tranzıtke qazaqstandyq ruqsattyń bolmaýyna baılanysty - 52 buzýshylyq, júkti úshinshi elden ruqsatsyz tasymaldaýǵa baılanysty - 24, memleket ishinde kabotajdy tasymaldardy júrgizýge qatysty - 4, júrgizýshilerdiń demalys jáne eńbek rejımin buzý faktisi boıynsha - 82 buzýshylyq anyqtaldy.
Tirkelgen buzýshylyqtardyń negizgi bóligi Reseı Federatsııasy (63), Ózbekstan (49), Belarýs (17), Túrkııa (16), Ázirbaıjan (11) jáne Ýkraına (6) tasymaldaýshylaryna qatysty boldy.
Anyqtalǵan faktiler boıynsha ákimshilik materıaldar jasaqtaldy.
