QR KKM qazaqstandyq 6 avıakompanııanyń paıdalanýshy sertıfıkatyn qaıtaryp aldy
ASTANA. 8 qazan. QazAqparat - QR KKM Azamattyq avıatsııa komıtetiniń mamandarynyń IKAO sarapshylarymen birlesip ótkizgen qaıta sertıfıkattaý nátıjesinde «D.E.T.A. Air» AQ, «MEGA» AK AQ,
«Evro-Azııa Eır Interneıshnl» AK AQ, «Samal Air» AK AQ jáne «Azııa Kontınental Eırlaıns», «KazEır Vest» AQ avıakompanııalarynyń avıatsııalyq qyzmetpen aınalysý quqyǵyn beretin sertıfıkattary qaıtarylyp alyndy. Bul sharalar avıakompanııalardyń sertıfıkatsııalyq talaptarǵa sáıkes bolmaýyna baılanysty qoldanyldy, dep habarlady Kólik jáne kommýnıkatsııa mınıstrliginiń baspasóz qyzmetinen.
«Semeıavıa» AQ avıakompanııasynyń eksplýatant ekendigi jónindegi sertıfıkaty uzartylǵan joq. Sertıfıkatsııalyq zertteý jónindegi ájeptáýir eskertpelerdiń aıqyndalýyna, onyń ishinde kompanııanyń qajetti shtat, ushý, ınjenerlik-tehnıkalyq qamtamasyz etý qujattarynyń bolmaýyna baılanysty «Irtysh-Air» jáne «Jet Airlaines» AK AQ-nyń sertıfıkattarynyń jaramdylyǵy eskertpelerdi joıǵanǵa deıin ýaqytsha toqtatyldy.
Bunyń syrtynda 163 áýe kemesi tekseristen ótti. Tekseris barysynda 1 áýe kemesin paıdalaný toqtatyldy, 22 áýe kemesinde belgilengen talaptarǵa sáıkessizdik anyqtaldy, olar búgingi tańǵa túzetildi.
Kommertsııalyq ushýlar jasaıtyn avıakompanııalar men áýe kemelerin qaıta sertıfıkattaý úderisi IKAO-nyń mamandarymen birlese otyryp aǵymdaǵy jyldyń naýryz aıynda bastalǵandyǵyn eske salamyz. Búgingi kúnge azamattyq avıatsııanyń 57 uıymy sertıfıkattaýdan qaıta ótkizildi. Olardyń arasynda 54 avıakompanııa men 3 tehnıkalyq qyzmet kórsetý jónindegi uıymdar jáne 163 áýe kemesi bar.
