QR QK-niń áskerı qyzmetshileri bolashaq jýrnalısterdi soǵysta jumys jasaýǵa daıyndaýda

ASTANA. QazAqparat - Astanada QR Qorǵanys mınıstrliginiń muryndyq bolýymen ekstremaldy jýrnalıstıka boıynsha «Áskerı dıskýrs» praktıkalyq semınary bastaldy, dep habarlady vedomstvonyń baspasóz qyzmeti.

Eń qyzyǵy, qatysýshylar retinde semınarǵa qatysýǵa alǵash ret L.N. Gýmılev atyndaǵy Eýrazııa ulttyq ýnıversıtetinde bilim alyp júrgen bolashaq jýrnalıster men saıasattanýshylar shaqyryldy. Úsh kún ishinde QR Qarýly Kúshteriniń tájirıbeli áskerı nusqaýshylary, sondaı-aq buqaralyq aqparat quraldarynyń ókilderi, aldyńǵy «Áskerı dıskýrs» semınarlarynyń qatysýshylary bozbalalar men boıjetkenderge qarýly qaqtyǵys aımaǵynda jýrnalıstiń jumys jasaý negizderin úıretýge tyrysyp baǵady. Olar áskerı is-qımyl oshaǵynda jumys jasaı otyryp, ómirdi qalaı saqtap qalýǵa bolatynyn jáne sapaly jýrnalıstik materıal jasaý, jeke derekterdi qalaı qorǵaý jáne ekstremaldy jaǵdaılarda jýrnalıske ne isteý kerek ekenin aıtyp, kórsetip beredi.

«Jastardyń kóńil-kúıi keremet, kózderi jalyndap tur. Olardyń birshamasy jýrnalıstıkadaǵy baǵyt-baǵdardy áli aıqyndaǵan joq. Alaıda, áskerı jýrnalıstıka olar úshin óte qyzyqty ekeni daýsyz. Keıbir jastardyń qazaqstandyq baspa basylymdarynda áskerı taqyrypta qalam terbep, jýrnalıstik materıaldar jazýda tájirıbeleri de bar. Bizdiń mindetimiz - bazalyq negiz berý, bolashaq jýrnalıstiń neni bilýi tıis, qandaı qıyndyqqa dýshar bolady, ony ne kútedi ekenin túsindirý», - dedi «Áskerı dıskýrs» semınarynyń bas nusqaýshysy maıor Rýstam Eıýbov.

Semınar dáris, praktıkalyq sabaqtar jáne kásibı tapsyrmalar formatynda birneshe jerde ótedi. Beıbit jaǵdaıda ǵana emes, sonymen birge soǵys jaǵdaıynda da óziniń kásipqoılyq mindeti boıynsha bolashaq jýrnalıster úshin atalmysh semınar kásibı turǵyda damý jáne ósý úshin tamasha múmkindik. Ásirese, «Áskerı dıskýrs» praktıkalyq semınary joǵary oqý ornyn támamdaǵannan keıin áskerı jýrnalıstıkada jumys jasaýǵa bel baılaǵandar úshin paıdaly bolyp tabylady.