QR QK Qurlyqtaǵy áskerler Áskerı ınstıtýtynda túlekter jaýyngerlik týmen qoshtasty
ASTANA. Shildeniń 12-si. QazAqparat - Qazaqstannyń baıyrǵy áskerı oqý ornynda - Qazaqstan Qarýly Kúshteriniń Qurlyqtaǵy áskerler Áskerı ınstıtýtynda jaýyngerlik týmen qoshtasý saltanaty ótti. Bul endi jas ofıtserlerdiń 38-inshi túlegi, dep habarlady QR Qorǵanys mınıstrliginiń baspasóz qyzmeti.
Áskerı ınstıtýttyń alańyna dıplom alý úshin 261 túlek - motoatqyshtar, tankishiler, artıllerııashylar, ınjenerler, desantshylar, avtomobılshiler, tyl jaýyngerleri, tárbıeshiler, brondy tank qarý-jaraqtary mamandary jáne tehnıkter - oqytý júrgiziletin barlyq on bir mamandyqtyń túlekteri sap túzedi. Olardyń arasynda Qyrǵyz Respýblıkasynyń toǵyz ókili bar.
Oqýdaǵy joǵary kórsetkishteri, memlekettik emtıhandardaǵy nátıjeleri jáne ınstıtýttyń qoǵamdyq ómirine belsene aralasqany úshin 18 kýrsant úzdik dıplomǵa ıe boldy, al olardyń 5-eýi «Qurmet taqtasyna» jazylyp, «Áskerı oqý ornyn úzdik bitirgeni úshin» tósbelgisimen marapattaldy.
Jaýyngerlik týmen qoshtasý quqyǵyna oqý úzdigi Ernur Seıfollın ıe boldy. Bul áskerı rásimdi jas ofıtserler jyl saıyn oqý bitirgen kúni atqarady. Sóıtip, dańqty ister estafetasy, áskerı dástúrler urpaqtan urpaqqa jalǵasýda.
Ernur jáne onyń taǵy eki joldasy, kýrsanttar Jalyn Qurmashev jáne Alekseı Kopııka úsheýi el Prezıdentiniń qolynan leıtenant pogondaryn alǵan bolatyn.
Qurlyqtaǵy áskerlerdiń Áskerı ınstıtýty 1970 jyly KSRO Joǵarǵy keńesi Tóralqasynyń qaýlysymen I.S.Konev atyndaǵy Almaty joǵary jalpy áskerı komandalyq ýchılışe retinde qurylǵan bolatyn.
1997 jyly aqpanda Qazaqstan Prezıdentiniń Jarlyǵymen QR Qarýly Kúshteriniń Áskerı akademııasyna aınaldy. Bes jyldan keıin Almaty joǵary áskerı ýchılışesi onyń quramynan bólinip shyqty da, bir jyldan keıin Qurlyqtaǵy áskerler Áskerı ınstıtýty atandy.
Instıtýt Ujymdyq qaýipsizdik sharty uıymy múshe-memleketteriniń qarýly kúshteri úshin birlesken áskerı kadrlar daıarlaıtyn oqý oryndarynyń tizimine engizilgen. Joǵary oqý ornynda Qyrǵyz Respýblıkasynyń jáne Tájikstan Respýblıkasynyń áskerı qyzmetshileri bilim alýda.
