QR QK eki ofıtseri araǵa jyl salyp, Batys Saharadan oraldy (FOTO)
ASTANA. QazAqparat - Qazaqstan Qarýly Kúshteriniń eki sardary BUU-nyń mıssııasynan oraldy. Kapıtan Temirlan Músápirov pen maıor Baqtııar Aqbalaev Batys Saharada (MINURSO) referendým ótkizý boıynsha Birikken Ulttar Uıymynyń mıssııasyna qatysa otyryp, áskerı baqylaýshylar retinde 30-dan asa eldiń ókilderimen qatar týra bir jyldaryn afrıkalyq elde ótkizdi.
Áskerı qadaǵalaýshylarǵa qoıylatyn talaptardy minsiz jáne úlgili oryndaǵany úshin bitimgershilik mıssııany oryndaý barysynda ofıtserler BUU-nyń medaldarymen marapattaldy, dep habarlady QR QM baspasóz qyzmeti. Qazir úılerine oralyp, kapıtan Temirlan Músápirov pen maıor Baqtııar Aqbalaev QR QK-degi ózderiniń qyzmetterine kirisip te ketti. Qazirgi ýaqytta áskerı baqylaýshylar retinde BUU-nyń bitimgershilik mıssııalarynda jeti qazaqstandyq sardar qyzmet ótkerip jatqanyn aıta ketken jón. Atap aıtsaq, beseýi Batys Saharasynda (MINURSO) jáne ekeýi Kot-d Ivýarda (UNOCI). Jalpy alǵanda, Qazaqstan Batys Saharasyndaǵy, Kot- d'Ivýardaǵy, Gaıtı men Lıberııadaǵy BUU-nyń árbir mıssııasyna bes ofıtserge deıin joldaýǵa ázir. BUU-nyń mandatyna sáıkes áskerı baqylaýshylardyń negizgi mindetteri jerústi jáne áýeden patrýldeýdi, túngi baqylaý beketin uıymdastyrý men ótkizýden, alynǵan aqparatty jınaý jáne saraptaýdan, qol qoıylǵan kelisimderdiń saqtalý jáne oryndalý monıtorıngisinen, sondaı-aq jaýapkershilik aımaǵynda buzýshylyqtardy aıqyndaýdan turady.
