QR QK: Astanadaǵy mamandandyrylǵan Balalar úıinde qaıyrymdylyq aktsııasy ótti (FOTO)
Qolbasshylyqtyń ofıtserleri, áıelder keńesiniń ókilderi balalarǵa qonaqqa keldi. Kúndelikti ómirde sábılerge qajetti 20 shana, jórgekter, shyryn jáne ózge de zattardy syıǵa tartty, dep habarlaıdy QR QM baspasóz qyzmeti.
Barlyq zattar Balalar úıi basshylyǵymen kelisý boıynsha áskerı qyzmetshilerdiń erkin túrde jınaǵan qarajatyna satyp alyndy. «Jańa jyl - tańǵajaıyp sát jáne tilekterdiń oryndalý kezi. Búginde búldirshinderge qolushyn sozýǵa jáne kele jatqan Jańa jyldyq qýanysh ári kóńil-kúı syılaýǵa múmkindik týyp otyr!», - dep atap ótti Áskerı-áýe kúshteri qolbasshysynyń orynbasary polkovnık Erkin Jumaǵalıev.
Bul aktsııa QR QK ÁQK ÁÁK Áskerı keńesiniń bastamasy boıynsha ótti jáne qolbasshylyq áskerı qyzmetshileriniń jalpy otyrysynda maquldandy. Ol Qazaqstan Qarýly Kúshteriniń áskerı qyzmetshileri udaıy negizde júrgizýge jáne qoldaýǵa tyrysyp júrgen qaıyrymdylyq sharalardyń bir bóligi bolyp tabylady. Búginde áskerı qyzmetshiler sheftik kómek kórsetip júrgen QR QK-niń árbir áskerı bólimine Uly Otan soǵysynyń ardagerleri men balalar úıiniń tárbıelenýshileri bekitilgen. Endi bul qatarǵa elordadaǵy mamandandyrylǵan Balalar úıi de kirdi. Mekeme ata-anasynyń qaraýynsyz qalǵan jetim balalarǵa, sondaı-aq júıke júıesi zaqymdalǵan, 4 jasqa deıingi oılaý qabileti jáne dene damýy turǵysynda kemistigi bar búldirshinderge tárbıe berý jáne medıtsınalyq kómek kórsetýmen aınalysady.
