QR QK áskerı qyzmetshileri Mı-6 tikushaǵyn kınoteatr etip qaıta jabdyqtady (FOTO)
Bul týraly QR Qorǵanys mınıstrliginiń baspasóz qyzmeti habarlady.
Atap aıtqanda, QR Qorǵanys mınıstrligi Ortalyq apparatynyń áskerı qyzmetshileri ata-anasynyń qaraýynsyz qalǵan jetim balalarǵa, sondaı-aq júıke júıesi zaqymdalǵan, oı-órisi jáne dene damýynda aqaýlyǵy bar múgedek balalarǵa tárbıe berý jáne medıtsınalyq kómek kórsetýmen aınalysatyn Astana qalasynyń mamandandyrylǵan balalar úıinde boldy. Polkovnık Murat Mákishev pen podpolkovnık Qýanysh Tóleýbekov Qazaqstan Respýblıkasy Qorǵanys mınıstrliginiń atynan bóbekter úıiniń tárbıelenýshilerin quttyqtady, olarǵa ártúrli oıynshyqtar syılady jáne búldirshinderge arnalǵan táttige toly dastarhan jaıdy. Odan basqa, áskerı qyzmetshiler bóbekter úıine aýyz sýdy tazartýǵa arnalǵan sý súzgishin tabys etti. 4 jasqa deıingi tárbıelenýshiler meımandarǵa kontsert qoıyp, «Qasqyr jáne jeti laq» teatrlandyrylǵan qoıylymyn usyndy. Bul mereke sábılerge kúlki, qýanysh jáne jaqsy kóńil-kúı syılaǵan naǵyz qııal-ǵajaıypqa toly ertegi boldy.
Al Aqtóbedegi Áýe qorǵanysy kúshteriniń áskerı ınstıtýtynda balalarǵa balmuzdaq pen sýsyndardy tegin taratýdy uıymdastyryp, batýt ornatty jáne asfaltta salynǵan sýretter baıqaýyn ótkizdi. Kınoteatr etilip jabdyqtalǵan Mı-6 tikushaǵynda balalar mýltfılmderin kórsetti. Sondaı-aq Semeı garnızonynyń 28738 á/b bazasynda sporttyq otbasylyq estafeta ótip, onda 36803 á/b áskerı qyzmetshileriniń otbasylyq komandasy Janǵabylovtar áýleti jeńiske jetti.