QR Qaýipsizdik keńesiniń janyndaǵy saraptamalyq keńestiń kún tártibinde Qazaqstannyń Kaspıı aımaǵyndaǵy ulttyq múddelerin ilgeriletý máseleleri talqylandy
ASTANA. Qazannyń 26-sy. QazAqparat - Búgin QR Prezıdentiniń kómekshisi-Qazaqstan Respýblıkasy Qaýipsizdik keńesiniń hatshysy Marat Tájınniń tóraǵalyǵymen Qazaqstan Respýblıkasy Qaýipsizdik keńesiniń janyndaǵy saraptamalyq keńestiń úshinshi otyrysy ótti, dep habarlaıdy QR Qaýipsizdik keńesi Hatshylyǵynyń baspasóz qyzmeti.
Kún tártibinde Qazaqstannyń Kaspıı teńizi aýmaǵyndaǵy ulttyq múddelerin ilgeriletý, sondaı-aq jalpyulttyq deńgeıdegi ekonomıkalyq qaýipsizdikke júrgizilgen monıtorıng júıelerin qurý týraly máseleler talqylandy.
Sarapshylardyń pikirinshe, Kaspıı mańy elderin qaýipsizdikpen qamtamasyz etý, saýda-ekonomıkalyq yntymaqtastyqty nyǵaıtý, sonymen qatar, qorshaǵan ortany qorǵaý salasyndaǵy jaǵalaý elderiniń birlesken sharalaryn kúsheıtý Qazaqstan Respýblıkasynyń Kaspıı aýmaǵyndaǵy ulttyq múddeleri ilgeri jyljytýdaǵy basty máseleler bolyp tabylady.
Otyrys barysynda jalpyulttyq deńgeıdegi ekonomıkalyq qaýipsizdik monıtorıngi men ólshemder júıesi máseleleri naqty sarapqa salyndy.
Otyrys qorytyndysyn shyǵara otyryp, sarapshylar keńesiniń tóraǵasy M.Tájın belgilengen problemalardy jan-jaqty jáne keshendi taldaý, sondaı-aq bul másele boıynsha usynbalar daıarlaý úderisine ǵylymı-sarapshylyq qoǵamdastyq ókilderin belsendi tartý qajettigin atap kórsetti.
QR Qaýipsizdik Keńesi janyndaǵy sarapshylyq keńes ulttyq qaýipsizdikti qamtamasyz etý salasyndaǵy ǵylymı-ádistemelik usynbalar ázirleý maqsatynda sarapshylyq zertteýler júrgizetin ǵylymı-keńesshi organ. Keńes músheleri jetekshi ǵalymdar, taldamashylar, ǵylymı-zertteý ortalyqtarynyń jáne úkimettik emes uıymdardyń ókilderi. Otyrystarǵa Qazaqstannyń memlekettik organdary men vedomstvolarynyń ókilderi qatysady.
Talqylaý barysynda Sarapshylyq keńes kún tártibindegi máseleler boıynsha naqty usynbalaryn berdi, olar Qazaqstan Respýblıkasy Qaýipsizdik Keńesiniń jáne QR Qaýipsizdik Keńesiniń Vedomstvoaralyq komıssııalarynyń odan ári jumystarynda paıdalanylatyn bolady.
