QR Kásipodaqtar federatsııasynyń tóraǵasy Atyraý oblysynda boldy

Sapar barysynda QR KF basshysy birqatar áleýmettik áriptestermen kezdesý ótkizdi. Talqylanǵan basty taqyryptar – jalaqy bereshegi, ony kóterý máselesin sheshý, eńbek daýlarynyń aldyn alý jáne óńirdegi áleýmettik áriptestik júıesin ary qaraı damytý.

QR KF tóraǵasy saparynyń alǵashqy kúni áleýmettik áriptestik jáne áleýmettik-eńbek qatynastaryn retteý jónindegi úshjaqty komıssııanyń jumysshy tobynyń otyrysyna qatysty. Otyrysqa oblys ákimdigi men jumys berýshi 12 kásiporynnyń ókilderi qatysty. Kásiporyndardyń basym bóligi eńbek daýlary qateri kartasyna engizilgen.

Jumysshy toptyń tóraǵasy – Atyraý oblysy Kásipodaq ortalyǵynyń jetekshisi Іzturǵan Baımuhanov bul kezdesýge jumyskerleri belgili bir talaptar qoıǵan munaı servıs kompanııalarynyń jetekshileri shaqyrylǵanyn atap ótti. Bul kásiporyndar jumyskerleriniń basty talaby qazirgi áleýmettik-ekonomıkalyq ózekti másele – aılyq jalaqy bereshegi nemese jalaqyny kóterýge qatysty.

Alaıda eńbek zańnamasyn buzýǵa tikeleı qatysty basqa da máseleler bar. Aıtalyq, Qyzylqoǵa aýdanyndaǵy Muqyr aýylynda ornalasqan «Aman» jobasyndaǵy «GazStroıMontaj» JShS-nyń 100 jumysshysy 21 aqpanda jumys isteýden bas tartqan. Jumyskerlerdiń basty shaǵymy – eńbek shartynyń jasalmaýy, zeınetaqy jarnalarynyń turaqty túrde aýdarylmaýy.

Taǵy bir iri kásiporyn Atyraý munaı óńdeý zaýytynda mehanıkalyq jabdyqtarǵa servıs jasaý jáne jóndeý jumystaryn atqaratyn «Servısnyı tsentr Kaztýrboremont» JShS-nda 279 adam jalaqyny 50%-ǵa kóterýdi jáne demalys kúnderi jumysqa shyqqandary úshin qosymsha eńbekaqy tóleýdi talap etken.

«Caspian Contractors Trust» JShS-nda jalaqyǵa qatysty qomaqty bereshek jınalyp qalǵan. Jumyskerler eńbek ınspektsııasyna byltyr qyrkúıek aıynan beri jalaqyny tólemeı kele jatqanyn aıtyp shaǵymdanǵan. Jumys berýshi ákimshilik jaýapkershilikke tartyldy jáne 2021 jyly jeltoqsan aıynda bankten nesıe alyp 95 mln teńge jalaqyny bereshegin tóleı bastaǵan.

Jumys berýshilerdiń ýájin tyńdaǵan QR Kásipodaqtar federatsııasynyń tóraǵasy: «Jalaqy boıynsha bereshekke kelsek, bul jumysberýshi óz jumyskeriniń qaltasyn qaǵyp ketti deýge bolady. Bul adamnyń Konstıtýtsııalyq quqyǵyn buzý», – dedi QR KF tóraǵasy.

Satybaldy Dáýletalınniń aıtýynsha, 2021 jyly tirkelgen eńbek daýlarynyń basty sebebi jaldanǵan jumyskerlerdiń eńbegine aqy tóleý máselesi bolǵan.

«2021 jyly biz 79 eńbek daýyn tirkedik, eńbekkerler negizi shaǵymy jalaqynyń tómendigine qatysty. Aıta keterligi, kásipodaqtary bar kásiporyndarda másele jedel sheshimin taýyp jatty. Eńbek daýynyń taǵy bir sebebi – jumysberýshiler eńbekkerlermen dıalog qurmaıdy, kásiporyndaǵy sol kezdegi qarjylyq ahýaldy túsindirmeıdi», – dep atap ótti QR KF tóraǵasy.

Ol Áleýmettik áriptestik jáne áleýmettik-eńbek qatynastaryn retteý jónindegi respýblıkalyq úshjaqty komıssııa qorytyndysy boıynsha áleýmettik áriptestik taraptaryna birqatar mindetter júktelgenin eske saldy.

«Eńbek ujymdarynyń kótergen barlyq ózekti máseleleri RÚK hattamasyna engizildi. Áleýmettik áriptesterge eńbekke aqy tóleý salasyndaǵy máseleni sheshý jónindegi jumysty birlesip júrgizý tapsyryldy. Onyń ishinde kásiporyndarda jasalatyn ujymdyq sharttardy taldaý da bar. Jekelegen kásiporyndarda ujymdyq shart resmı nusqa úshin ázirlenetini qupııa emes», – dedi Satybaldy Dáýletalın.

QR KF tóraǵasy jumysberýshilerdi kásipodaqtar jáne memlekettik organdarmen birlesip eńbek salasyndaǵy qordalanyp qalǵan máselelerdi 16 naýryzǵa josparlanǵan óńirlik úshjaqty komıssııa otyrysynda qarastyrýdy usyndy.

Áleýmettik áriptesterdiń birlesken jumysyna qatysty máselelerdi talqylaý Atyraý oblysy Kásipodaq ortalyǵy bastamasymen qurylǵan kelissóz júrgizýshi pýlymen QR Kásipodaqtar federatsııasy tóraǵasynyń kezdesýi barysynda jalǵasty.

«Áleýmettik shıelenis jáne yqtımal eńbek janjaldarynyń aldyn alý maqsatynda azamattyq ustanymy men mol tájirıbesi bar adamdardy «Eńbek elshisi» dep ataımyz. Ol jumysberýshimen jáne kásiporyndardyń jumysshylarymen kelissóz júrgizýge múmkindik bere alatyn adamdardy «, – dedi Satybaldy Dáýletalın Kásipodaq ortalyǵy janyndaǵy kelissóz júrgizýshiler pýlymen kezdesý barysynda.

Pýl quramyna Atyraý óńirindegi bedeldi tulǵalar engen, olardyń arasynda jumysberýshiler, kásipodaq belsendileri, qoǵam qaıratkerleri jáne jýrnalıster bar.

«Eńbek elshisi» kelissóz júrgizýshisiniń basty mindetiniń biri – jumysberýshilermen eńbek konsýltatsııasyn uıymdastyrý jáne júrgizý. Ókinishke oraı, kásipodaqtardy jaýyndaı kóretin jumysberýshiler bar. Jekelegen jumysberýshiler jumyskerdiń, eńbek ujymynyń máselesin sheshe otyryp, ol kásiporynnyń barlyq máselesi sheshim tabatynyn túsinbeıdi. Kásipodaq pen jumysberýshi – qarsylastar emes áleýmettik seriktester. Іs júzinde kásipodaq jumys isteıtin kásiporyndarda jumysker quqyǵy men múddesi saqtalatynyn kóremiz. Eńbek daýlary áleýmettik seriktester taraptaryna zalal keltirmeı jyldam sheshiledi», – dep atap ótti QR KF tóraǵasy.

Óz kezeginde «ıÝSS Sýpport Servısız» kompanııasyndaǵy bastaýysh kásipodaq uıymynyń tóraǵasy, Eńbek elshisi Maral Kóshenov kelissóz júrgizýshi pýl qyzmetine qatysty oıymen bólisti.

«Pýl jumysberýshi men jumyskerge áleýmettik seriktestik negizderin túsindire adamdardan quralǵan. Bizdiń jumysymyz adamdardy kásipodaqtarǵa uıysýǵa shaqyryp, ózderiniń eńbek quqyqtaryn zańdy jolmen qorǵaýǵa múmkindik beredi dep oılaımyn», – dedi Maral Kóshenov.

Satybaldy Dáýletalın áriptesterine tabys tileı otyryp, Eńbek elshileri jumysynyń arqasynda Atyraý oblysyndaǵy eńbek salasyna qatysty jaǵdaı turaqty damıdy degen senim bildirdi.

QR Kásipodaqtar federatsııasynyń tóraǵasy Satybaldy Dáýletalın Atyraý oblysynyń ákimi Mahambet Dosmuhambetovpen kezdesýinde óńirdegi kásiporyndarda áleýmettik turaqtylyqty saqtaýdyń mańyzdy ekendigi aıtyldy.

Tarapta áleýmettik áriptestik júıesin damytýǵa birlesip atsalysý, áleýmettik-eńbek salasyndaǵy ózekti máselelerdi birlese sheshý mańyzdy ekendigine toqtaldy.

QR Kásipodaqtar tóraǵasy óńirge jumys saparynda S. Balǵymbaev ken ornyna barady jáne «Embimunaıgaz» AQ eńbek ujymy men Atyraý oblysy kásipodaq aktıvimen kezdesedi.