QR Kásipodaqtar federatsııasy: Turaqty kásiporyn - turaqty qoǵam - turaqty el

ASTANA. QazAqparat - Turaqty kásiporyn - turaqty qoǵam - turaqty el. QR Kásipodaqtar federatsııasynyń tóraǵasy Baqytjan Ábdiraıym uıymnyń basty uranyn atady, dep habarlaıdy QazAqparat.

«Bizdiń basty uranymyz «Turaqty kásiporyn - turaqty qoǵam - turaqty el» dep atalady. Turaqtylyq kez kelgen qoǵamnyń basty qundylyǵy bolyp sanalady. Eger qyzmetker kásiporynnyń turaqty damyp jatqanyn, óziniń áleýmettik turǵyda jáne zań júzinde qorǵalǵanyn sezse, otbasynda da barlyǵy jaqsy bolady. Bul ózara baılanysty úderis», - dedi Baqytjan Ábdiraıym QR Kásipodaqtar federatsııasynyń kezekten tys XXV sezinde.

Onyń aıtýynsha, áleýmettik seriktestermen birge, «Atameken» ulttyq kásipkerler palatasy, kompanııalar men kásiporyndardyń basshylary Qazaqstannyń árbir kásipornyndaǵy áleýmettik turaqtylyqqa qoldaý jasaýdyń mehanızmderi men standarttaryn ázirleýi tıis.

QRKF tóraǵasy aldaǵy jyldardaǵy eń mańyzdy mindetterdi, onyń ishinde óndiristegi eńbek qaýipsizdigi men densaýlyqty nyǵaıtý, jumys isteıtin adamnyń áleýmettik qorǵalý salasyn jańartý máselelerine nazar aýdardy.

Eske sala ketsek, Astanada QR Kásipodaqtar federatsııasynyń kezekten tys XXV sezi óz jumysyn bastady.

Jıyn qatysýshylaryna QR Memlekettik hatshysy Gúlshara Ábdiqalyqova Qazaqstan Prezıdenti Nursultan Nazarbaevtyń quttyqtaý hatyn oqyp berdi.

Jalpy QR Kásipodaqtar federatsııasy seziniń jumysyna Qazaqstannyń barlyq óńirlerindegi salalyq kásipodaq uıymdary atynan 200-den astam delegat qatysýda.