QR Qarjylyq monıtorıng agenttigi janynan Qoǵamdyq keńes quryldy
NUR-SULTAN. QazAqparat - Qazaqstan Respýblıkasynyń «Qoǵamdyq keńester týraly» Zańyna sáıkes «Halyq únine qulaq asatyn memleket» tujyrymdamasyn iske asyrý sheńberinde jáne Aqparat jáne qoǵamdyq damý mınıstrliginiń ádistemelik qoldaýymen Qazaqstan Respýblıkasy Qarjylyq monıtorıngi agenttiginiń janynan Qoǵamdyq keńes quryldy, dep habarlaıdy QazAqparat.
Aıta keteıik, Qazaqstan Respýblıkasynyń Qarjylyq monıtorıng agenttigi Memleket basshysy Qasym-Jomart Toqaevtyń tapsyrmasy boıynsha kóleńkeli ekonomıkaǵa qarsy is-qımyldyń tıimdiligin arttyrý úshin qurylǵan bolatyn.
Qoǵamdyq keńes jańa memlekettik organnyń qyzmetine qoǵamdyq baqylaýdy júzege asyrý maqsatynda quryldy. 2021 jylǵy 1 sáýirde ótken Qoǵamdyq keńestiń otyrysynda onyń tóraǵasy Sálimbaı Shúneev saılandy.
S.Shýneevtiń salyq ınspektsııasy, prokýratýra, qarjy polıtsııasy organdarynda, sondaı-aq Qaýipsizdik Keńesi men Bas prokýratýrada basshylyq laýazymdarda jumys tájirıbesi bar. Qyzmette bolýdyń shekti jasyna jetýine baılanysty sybaılas jemqorlyqqa qarsy qyzmetten bosatylǵan.
Sonymen qatar, otyrys barysynda Agenttik qyzmetiniń baǵyttary boıynsha qurylatyn komıssııalardyń sany jáne qoǵamdyq keńes tóralqasynyń quramy bekitildi, sondaı-aq komıssııalardyń tóraǵalary saılandy.
Qazaqstan Respýblıkasy Qarjylyq monıtorıngi agenttiginiń qoǵamdyq keńesi azamattyq qoǵamnyń múddelerin bildirý jáne sheshimder qabyldaý kezinde jurtshylyqtyń pikirin eskerý, memlekettik basqarýdy jetildirý jáne organ qyzmetiniń ashyqtyǵyn qamtamasyz etý maqsatynda qurylǵan konsýltatıvtik-keńesshi, baıqaýshy organ bolyp tabylady.
Esterińizge sala keteıik, Qoǵamdyq keńester memleket pen azamattyq qoǵam arasyndaǵy dıalog nysany retinde «100 naqty qadam» Ult josparyn iske asyrý aıasynda qurylǵan.
