QR Qarjy polıtsııasy «Teńizshevroıl» JShS-niń 212 mlrd. teńge somasyndaǵy munaıdy zańsyz óndirýi faktisi boıynsha qylmystyq is qozǵady

Bul týraly búgin QR Ekonomıkalyq qylmysqa jáne sybaılas jemqorlyqqa qarsy kúres agenttiginiń resmı ókili (qarjy polıtsııasy) Murat Jumanbaı málim etti.

«QR Bas prokýratýrasynan kelip túsken Teńizshevroıl JShS-niń 212,4 mıllıard teńgeniń munaıyn zańsyz alý faktisine qatysty qyzmetiniń tekseris materıaldary boıynsha agenttikpen bıylǵy jylǵy maýsymnyń 12-inde QR Qylmystyq kodeksiniń 190-shy baby, ıaǵnı asa iri kólemde tabys tabýmen ushtasqan zańsyz kásipkerlik boıynsha qylmystyq is qozǵaldy»,- dedi M. Jumanbaı.

«Tekseris barysynda TShO JShS «Teńiz» munaı ken ornynda belgilengen aýmaqtan tys, ıaǵnı 5 myń 100 metr tereńdikten tómen 41 uńǵymany qazǵandyǵy anyqtaldy»,- dep toqtaldy ol.

Atap aıtqanda 2002 jylǵy qyrkúıektiń 1-inen bıylǵy jylǵy maýsymnyń 1-i aralyǵynda 10 uńǵymadan taý ken belgisiniń aýmaǵynan tys 3,4 mln. tonna munaı óndirilgen.

«Tergeý sharalary júrgizilýde jáne ózge aqparat tergeý múddesine baılanysty jarııalanbaıdy»,- dedi resmı ókil.