QR Qarjy mınıstrligi jumys berýshilerdi óz jumysshylarynyń naqty jalaqysyn kórsetýge yntalandyratyn zań jobasyn ázirleýde
ASTANA. 22 sáýir. QazAqparat - QR Qarjy mınıstrligi jumys berýshilerdi óz jumysshylarynyń naqty jalaqysyn kórsetýge yntalandyratyn zań jobasyn ázirlep jatyr.
Bul týraly KTK arnasyndaǵy «Halyq qyzmetshisi» baǵdarlamasynda QR Qarjy mınıstri Bolat Jámishev málim etti.
«Búginde bizde «aq» jalaqyny kórsetýge yntalandyrmaıtyn salyqtyq erejeler bar. Arnaıy salyqtyq tártippen jumys isteıtin sharýa qojalyqtarynda nemese zańdy tulǵalarda óz jumysshylarynyń naqty jalaqysyn kórsetýge qyzyǵýshylyq joq. Saýdadaǵy adamdardyń deni patent arqyly jumys istep, olar ortasha alǵanda 800 teńge kóleminde zeınetaqy jarnasyn tóleıdi», - dep atap ótti B. Jámishev.
Mınıstrdiń sózine qaraǵanda, ázirlenip jatqan túzetýler jumys berýshiler tóleıtin salyqtyń kólemin birneshe jalaqy tóleý qorlarynan kiristi shegerý esebinen azaıtýǵa jol ashady.
Zańnamaǵa engiziletin josparly ózgeristerdiń maqsaty azamattardyń zeınetaqy jınaǵyn eseleý bolyp tabylady.
