QR Qarýly Kúshteriniń jekelegen bólimshelerin kúsheıtý josparlanyp otyr
Qorǵanys vedomstvosynyń basshysy áskerlerdiń bas qolbasshysy men qolbasshysyna, áskerı qyzmetshilerdiń táýliktik kezekshilikke (narıadqa) jáne jaýyngerlik kezekshilikke túsý jıiligin qaıta qaraýǵa nusqaý berdi. Tym jıi kezekshilikter, qaraýyldar sarbazdardyń óz mindetterine talapqa saı atqarýyna keri áserin tıgizedi.
«Merzimdi qyzmettegi áskerı qyzmetshilerdi ásker qataryna qabyldaý jalǵasýda. 31 shildede shaqyrý aıaqtalǵanǵa deıin áskerge shaqyrylýshylardy PTR ádisimen COVID-19-ǵa tekserýdi jalǵastyrý qajet»,-delingen habarlamada.
Sondaı-aq onda áýe qorǵanysy kúshterinde taktıkalyq-saptyq sabaqtar ótkizilgendigi aıtylǵan.
Ushý ekıpajdary kúndizgi jáne túngi jaǵdaılarda óz mindetterin oryndap, parashıýt daıyndyǵy boıynsha sabaqtar júrgiziledi. Áskerı ushý joǵary oqý ornynyń kýrsanttary da kásibı praktıkadan ótedi. Bolashaq ushqyshtardy tájirıbeli nusqaýshylar daıarlaıdy. Ótken aptada Aqtaýda avıatsııalyq bazanyń jaýyngerlik daıyndyǵy tekserildi, onyń avıatsııalyq parki tórt Mı-35M tikushaǵymen tolyqty. Qazirgi ýaqytta tehnıkany qabyldaý júzege asyrylýda.
Mınıstr túrli jaǵdaılarǵa der kezinde den qoıý úshin avıatehnıka men áskerı-kólik avıatsııasynyń ekıpajdarynyń daıyndyǵy myqty bolýy qajettigin eskertti.
Áskerı-teńiz kúshteri kemeleriniń ekıpajdary jeke kememen belgilengen maqsaty boıynsha mindetterdi pysyqtaý jónindegi kýrstyq esepti oryndaıdy. Kýrstyq tapsyrmalardy tapsyrý protsesi ár kemeni daıyndaý baǵdarlamasynyń quramdas bóligi bolyp tabylady.
Óńirlik qolbasshylyqtardyń áskerlerinde arnaıy-taktıkalyq oqý-jattyǵýlar ótkizildi, mamandyq boıynsha daıyndyq aıaqtalýda. Oqý-jattyǵýdyń qorytyndysy boıynsha baqylaý sabaqtary uıymdastyrylady.
«2019 jyldyń uqsas kezeńimen salystyrǵanda árbir áskerı qyzmetshiniń oqý deńgeıin naqty baǵalaý kerek», – dep tapsyrdy Nurlan Ermekbaev.
«Ońtústik» óńirlik qolbasshylyǵynyń basqarý organdary «Aldaspan-2020» jedel-taktıkalyq komandalyq-shtabtyq oqý-jattyǵýlaryna daıyndyq sheńberinde jınalys ótkizdi.
Tórtinshi bitimgershilik rotany BUU-nyń Lıvandaǵy mıssııasyna jiberýge jaýapty laýazymdy tulǵalardyń baıandamalary tyńdaldy.
Qarýly Kúshter polıgondaryn jappaı tazalaý jumystary jalǵasýda.
Talqylaý armııalyq taktıkalyq atystyń damýyna da áser etti. Buǵan deıin Qorǵanys mınıstri áskerı qyzmetshilerdiń túrli jaǵdaılarda, atap aıtqanda qozǵalysta, túregep turyp, tizeden, qozǵalystaǵy nysanalar boıynsha atý daǵdylaryn qalyptastyrý maqsatynda áskerı taktıkalyq atý boıynsha jattyǵýlardy jaýyngerlik daıarlyq baǵdarlamasyna engizý týraly tapsyrma bergen bolatyn.
Qorǵanys vedomstvosynyń basshylyǵymen áskerı qyzmetshiler arasynda alǵashqy jarystar ótkizý tapsyryldy. Osyǵan baılanysty áskerı taktıkalyq atý federatsııasyn qurý týraly, jeke quramnyń jattyǵý protsesin uıymdastyrý úshin, Qarýly Kúshterde kópfýnktsıonaldy atys ortalyǵyn qurý jóninde usynystar engizý týraly nusqaý berildi.
Qorǵanys vedomstvosynyń basshysy jalpy qaýipsizdik máselelerindegi Qarýly kúshterdiń árbir áskerı qyzmetshisi men qyzmetshileriniń jaýapkershiligi týraly eskertti. Qalǵan jeke quramnyń densaýlyǵyna qaýip tóndirmeı, emdeý kýrstaryn jáne tolyq saýyqqanǵa deıin oqshaýlaý rejımin saqtaý kerek.
Mınıstr ınfraqurylymdy sapaly qalyptastyrýmen jáne medıtsına mamandarynyń sanyn arttyrýmen medıtsınalyq qyzmet bólimshelerdi damytý josparyn ázirleý mindetin qoıdy.
2020 jyldyń sáýirinde Radıatsııalyq, hımııalyq, bıologııalyq qorǵaý jáne ekologııalyq qaýipsizdik departamenti quryldy. Búgingi jaǵdaı Qarýly Kúshterde áskerı ýaqytta da, beıbit ýaqytta da, túrli sıpattaǵy tótenshe jaǵdaılardaǵy mindetterdi oryndaýǵa qabiletti «qos maqsattaǵy» quramdaýyshtardyń bolýy qajettigin kórsetti. Osy áskerlerdiń qurylymy men quramy qazirgi zamanǵy talaptarǵa jáne perspektıvalyq mindetterge sáıkes kelýge tıis.
