QR Qarýly Kúshteriniń jas sarbazdary ant qabyldady

ASTANA. QazAqparat - Óńirlik qolbasshylyqtardyń birqatar áskerı bólimshesinde armııa sapyna jańadan qosylǵan sarbazdardyń ant berý rásimi ótti, dep habarlaıdy QazAqparat QR Qorǵanys mınıstrliginiń baspasóz qyzmetine silteme jasap.

Astana, Almaty qalalarynan, Aqmola, Jambyl, Qaraǵandy, Pavlodar, Aqtóbe, Almaty, Túrkistan, Batys Qazaqstan jáne Shyǵys Qazaqstan oblystarynan merzimdi qyzmetke alynǵan 1 myń áskerı qyzmetshi týys-týǵandarynyń, komandırleri men qyzmettesteriniń, sondaı-aq Ekinshi dúnıejúzilik soǵys jáne QR Qarýly Kúshteriniń ardagerleri aldynda ant qabyldady.

Ant berý rásiminen keıin áskerlerdiń ata-analary kazarmalardy, ashanalardy aralap, sport qalashyqtary men klýbtarǵa bardy.
 

«Ulymnyń komandırleri jaqsy eken, kazarmalar jyly, ashana muntazdaı. Ulymyzdy maqtan etemiz. Qyzmettesterimen birge ol naǵyz Otan qorǵaýshy bolý úshin áskerı istiń qyr-syryn meńgeredi», - deıdi áskerı qyzmetshi Rasul Rýslanovtyń anasy Nazgúl Bekbosynova.