QR Qarýly Kúshteriniń ókilderi AQSh Qarýly Kúshteriniń áskerı bazalaryna bardy

ASTANA. QazAqparat - Qazaqstan Respýblıkasy Qarýly Kúshteriniń ınjener áskerleriniń bir top ofıtseri AQSh Qarýly Kúshteriniń ınjener mamandar daıarlaıtyn eki oqý ortalyǵyna bardy, dep habarlaıdy QazAqparat QR Qorǵanys mınıstrliginiń baspasóz qyzmetine silteme jasap. 

Qazaqstandyq ofıtserler delegatsııasynyń AQSh Vırdjınııa shtatyndaǵy Fort Lı jáne Fort Ep-Hıll oqý ortalyqtaryna barýdaǵy maqsaty ınjenerlik daıarlyq jáne mınadan tazartý, sondaı-aq taktıkalyq zveno mamandaryn daıarlaý máseleleri boıynsha aqparat almasý boldy.

Ekijaqty brıfıngte №65476 áskerı bólimshe mınadan tazartý ortalyǵynyń bazasynda amerıkalyq mamandardyń qatysýymen mınadan tazartý jáne jarylý qaýpi joǵary zattardy joıý salasynda ınstrýktorlardy daıarlaý kýrstaryn ótkizý múmkindikteri talqylandy.

Sapar barysynda QR Qarýly Kúshteriniń áskerı qyzmetshileri AQSh Qarýly Kúshteri ınjenerlik bólimsheleriniń oqý baǵdarlamasy jáne materıaldyq-tehnıkalyq bazasymen tanysty, sondaı-aq olarǵa saper robottardyń jumysy kórsetildi.