QR Qarýly Kúshteriniń ofıtserler quramy attestatsııadan ótedi
Attestatsııa júrgizýdiń basty mindeti - árbir áskerı qyzmetshiniń kásibı jáne iskerlik qabiletterin, áleýetti múmkindikterin anyqtaý. Attestatsııa - áskerı qyzmetshilerdiń atqaratyn laýazymdaryna sáıkestikteri men olardy ári qaraı qyzmette paıdalaný perspektıvalaryn, kelisimshart boıynsha áskerı qyzmetshiler qyzmet merzimin uzartýdyń oryndylyǵyn, áskerı qyzmetshilerdi daıarlaý (qaıta daıarlaý) jumystaryn jetildirýdiń baǵyttaryn aıqyndaıdy. Sonymen qatar, attestatsııa qyzmet satysymen kóterilý úshin áskerı qyzmetshilerdiń kadrlyq rezervin qalyptastyrý nemese oqýǵa jiberý jáne áskerı qyzmetshilerge kemshilikterdi joıý jónindegi keńester ázirleý mindetterin atqarady. Bıyl Qarýly Kúshter ofıtserlik korpýsyn josparly attestatsııalaý 2015 jylǵy 12 qańtar men 1 qarasha aralyǵynda eki kezeńde ótedi. 2015 jylǵy 12 qańtardan 1 maýsymǵa deıin attestatsııalaýdan batalon (dıvızıon), baza komandıri, orynbasarlary jáne oǵan teń laýazymdardy atqaratyn ofıtserler ótedi. Sonymen qatar, qyzmette jáne jeke tártibinde aıtarlyqtaı kemshilikteri bar ofıtserler de tekserýden ótedi. 2015 jylǵy 1 maýsym men 1 qarasha aralyǵynda ótetin attestatsııalaýdyń ekinshi kezeńinde qalǵan ofıtserler quramy atestattalatyn bolady. Attestatsııa barysyn tıimdi baqylaý maqsatynda kezeńderi tórt shaǵyn kezeńge bólingen. Ekinshi kezeń eki bólimnen turady. Ár shaǵyn kezeń sońynda ofıtserlik quramdy attestatsııalaýdyń qorytyndylary BAQ-ta jarııalanyp, attestatsııa barysyn taldaý jumystary júrgiziletin bolady. Kadr organdardardan basqa, attestatsııalaýǵa psıhologtar, zańgerler, jaýyngerlik daıarlyq jáne dene daıarlyǵy ofıtserleri qatysady.