QR Qarýly Kúshteriniń medıtsına qyzmetkerleri kásibı merekege daıyndalýda (FOTO)
Qazaqstan Qarýly Kúshterinde erteń merekelik is-sharalar ótedi. Elimizdiń barlyq óńirlerinde: Qurlyq áskerlerinde, Áýe qorǵanysy kúshteri men Áskerı-teńiz kúshterinde ornalasqan áskerı gospıtalderdiń medıtsına qyzmetindegi áskerı qyzmetshilerdi kásibı merekelerimen quttyqtap, alǵys hattary men estelik syılyqtaryn tartý etedi.
Áskerı dáriger bolý - bul naǵyz beıimdelýdi talap etetin kásip. Qazaqstandyq áskerı dárigerler úshin erliktiń úzdik úlgisi Uly Otan soǵysy jyldary naǵyz erlik kórsetken olardyń batyr áriptesteri bolyp sanalady. Surapyl soǵys jyldary názik jandylarǵa da kúrdeli, ári aýyr mindet júktelgen bolatyn. Ózderi artıllerııadan jaýǵan oqtyń astynda qalsa da, olar óz betinshe urys dalasynan talaı jaraly jaýyngerleri alyp shyqty.
Búginde ózderiniń kúndelikti eńbegimen áskerı dárigerler Qazaqstan Qarýly Kúshteriniń áskerı qyzmetshilerine qol ushyn berýde. Olardyń basty mindeti - áskerı qyzmetshiler men olardyń otbasy músheleriniń densaýlyǵyn saqtaý jáne ony nyǵaıtý. Armııada dárigerlerdiń adam ómirin saqtap qalý oqıǵalary jıi kezdesetin jaǵdaı.
Esterińizge sala ketsek, bir aıǵa jýyq ýaqyt buryn Jambyl oblysynda QR Qarýly Kúshteri 63302 áskerı bólimi irgesindegi áskerı medıtsına jeke jasaǵynyń áskerı dárigerleri klınıkalyq ólim jaǵdaıynda kelip túsken qyzdyń ómirin qutqaryp qaldy.
Sonymen qatar, QR QK áskerı medıtsına qyzmeti bıyl Armııa halyqaralyq oıyndarynyń «Áskerı-medıtsınalyq estafeta» baıqaýyna qatysqanyn erekshe atap ótken jón. Budan ózge, erteń Astanada saǵat 11.00-de QR QK ulttyq áskerı-patrıottyq ortalyǵynda Medıtsına qyzmetkerleri kúnine arnalǵan saltanatty is-shara ótedi. Іs-shara barysynda medıtsına qyzmetinde erekshe kózge túsken áskerı qyzmetshi dárigerlerdiń esimderi atalady.
Merekelik is-sharaǵa alǵash ret barlyq ásker túrleri boıynsha medıtsına qyzmetteriniń bastyqtary qatysatyn bolady. Resmı rásim aıaqtalǵan soń osy saladaǵy áskerı qyzmetshilerdiń uıymdastyrýymen ázirlengen merekelik kontsert ótedi.
