QR Qarýly Kúshteriniń qoımalary janynan tyıym salynatyn aımaqtar men aýdandar belgilenedi - Májilis
ANA. 2 naýryz. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda palata depýtattary «QR keıbir zańnamalyq aktilerine Qarýly Kúshterdiń,
basqa da áskerler men áskerı qurylymdardyń arsenaldary, bazalary men qoımalary janyndaǵy tyıym salynǵan aımaqtar men tyıym salynǵan aýdandar máselesi boıynsha tolyqtyrý engizý týraly» zań jobasy birinshi oqylymda maquldandy.
Atalǵan zań jobasynyń maqsaty Qarýly Kúshterdiń áskerı qurylymdarynyń arsenaldarynda, qoımalarynda saqtalatyn oq-dáriler men jarylǵysh zattardyń qaýipsizdigin qamtamasyz etý júıesin jetildirý bolyp tabylady. Osyǵan oraı zań jobasy men qoldanystaǵy zańnamalarǵa birqatar normalar engiziledi.
«Birinshiden, arsenaldardy qoımalarda turǵan oq-dáriler men jarylǵysh zattardyń qaýipsizdigin jáne saqtalýyn qamtamasyz etý kózdelip otyr. Sonymen qatar qarý-jaraq saqtaý nysandarynda jáne olar janasatyn aýmaqtarda turatyn turǵyndardyń qaýipsizdigin qamtamasyz etý sharalary qarastyrylady. Sondaı-aq qarý-jaraq saqtaý nysandarynyń aýmaqtaryna dıversııaǵa qarsy jáne órtke qarsy is-sharalardy ótkizý úshin qolaıly jaǵdaılar jasaý kózdeledi»,-dedi zań jobasy boıynsha baıandaǵan Qorǵanys mınıstriniń orynbasary Talǵat Janjúmenov.
Budan bólek Úkimetke Qarýly Kúshterdiń qoımalary janyndaǵy tyıym salynǵan aımaqtar men tyıym salynǵan aýdandardy belgileý ókilettigi beriledi. Al, tyıym salynǵan aýmaqtardaǵy belgili shekteýlerdi buzǵany úshin ákimshilik jaýapkershilikter qarastyrylyp, aıyppuldar salý da kózdelip otyr.
Birinshi oqylymda maquldanǵan zań jobasy, ekinshi oqylymǵa ázirleý úshin bas komıtetke tapsyrylady.
