QR Qarýly kúshteriniń basshylyq quramy bir jyldyq zamanaýı áskerı óner kýrsyn bitirdi (FOTO)

ASTANA. QazAqparat - QR Qorǵanys mınıstrliginde qorǵanys vedomstvosynyń basshysy Imanǵalı Tasmaǵambetov QR Qorǵanys mınıstrliginiń basshylyq quramyna QR Tuńǵysh Prezıdenti - Ult kóshbasshysy atyndaǵy Ulttyq qorǵanys ýnıversıtetiniń bazasynda ótken kýrs baǵdarlamasyn aıaqtaǵany týraly kýálikti tabys etti, dep habarlaıdy mınıstrliktiń baspasóz qyzmeti.

Ulttyq qorǵanys ýnıversıteti Bas shtaby fakýltetiniń «Áskerı jáne memlekettik basqarý» mamandyǵy boıynsha magıstratýraǵa arnalǵan oqý baǵdarlamasynyń negizine súıengen áskerı óner kýrsy qyrkúıek pen maýsym aılary aralyǵynda ótti. Baǵdarlama tek strategııalyq jáne jedel-strategııalyq basqarý tobynyń basshylyq quramyna arnalǵan.

Kýrs barysynda jaýyngerlik quram, Qarýly kúshterdiń qurylymy, Qazaqstan Respýblıkasynyń jáne sheteldik memleketterdiń áskerı doktrınasy týraly jalpylama tanystyrýlar tolyǵymen qamtyldy. «Qurmetti general jáne ofıtser myrzalar, búgin erekshe jaǵdaıda jınalyp otyrmyz. Bizdiń vedomstvonyń tarıhynda tuńǵysh ret Qorǵanys mınıstrliginiń basqarýshy quramyna Bas shtab fakýltetiniń kýrstyq baǵdarlamasyn bitirgeni týraly kýálik tapsyrýdamyz. Olar jyl boıy áskerı istiń qyr-syryn meńgerip, onyń ereksheligi men negizgi baǵyttaryn úırendi. Bul oraıda, qujatty tapsyrmas buryn barsha tyńdaýshylar atynan oqytýshylarǵa úlken alǵys bildiremin. Ár dáristiń taqyryby mazmuny jaǵynan jáne kásibı turǵydan ózekti boldy. Tájirıbe júzinde biz osyndaı oqytý formatyn alǵash ret qoldanyp otyrmyz. Onyń nátıjesiniń tıimdiligin túrli baǵyttan ańǵarýǵa bolady» - dedi QR Qorǵanys mınıstri Imanǵalı Tasmaǵambetov.

Kýrsty támamdaǵany jóninde kýálikti QR Qorǵanys mınıstriniń qolynan Qorǵanys mınıstriniń birinshi orynbasary - QR QK Bas shtabynyń bastyǵy general-polkovnık Sáken Jasuzaqov, Qorǵanys mınıstriniń orynbasarlary general-leıtenant Oqas Saparov, general-maıor Talǵat Muhtarov, Nurlan Saýranbaev, Berik Sholpanqulov, Bilim jáne ǵylym departamentiniń bastyǵy Aıgúl Tólembaeva aldy.

Atalǵan kýrstarda zamanaýı áskerı janjaldardyń mazmuny men máni, olardyń strategııalyq negizi jáne strategııalyq is-qımyl formasy oqytyldy (Qarýly kúshterde qoldanylýy). Sonymen qatar, Irak, Aýǵanstan, Ýkraına, Sırııadaǵy áskerı qaqtyǵystardyń tájirıbesi negizinde soǵysty júrgizýdiń jańa tásilderi, áskerı saladaǵy zańnama zerdelendi. Endigi kezekte osyndaı kýrstar Bas shtab bastyǵynyń orynbasarlary, bas qolbasshylar, qolbasshylar, departament jáne basqarma bastyqtary úshin ótkiziletin bolady.