QR Qarýly Kúshteriniń áskerı qyzmetshisi trıatlonnan chempıon atandy

ASTANA. QazAqparat - Almaty oblysynyń Qapshaǵaı qalasynda olımpıadalyq qashyqtyqtyń standarty boıynsha 1 500 metrge júzý, 40 shaqyrymdyq sporttyq velojarys pen 10 shaqyrymǵa júgirýde jeńil atletıka boıynsha saıystyń úsh túrinen sporttyq trıatlonnan chempıonat ótti, dep habarlaıdy mod.gov.kz.

Chempıonatqa barsha Qazaqstannyń sportshylary qatysty. QR Qarýly Kúshterinen qatysqan birden-bir áskerı sportshy Áýe qorǵanysy kúshteriniń áskerı qyzmetshisi aǵa leıtenant Alekseı Meshalkın boldy. Ol trıatlonnyń barlyq túrinen birinshi oryn aldy.

Aǵa leıtenant Alekseı Meshalkın 2006 jyldan bastap velosportpen kásibı turǵyda shuǵyldana bastady. 2007 jyly Shyǵys Qazaqstan oblysynyń chempıonatyna qatysty. Onda ekinshi oryndy jeńip alyp, sport sheberine kandıdat normatıvin oryndady. 2014 jyldyń tamyzynda Belarýs Respýblıkasynyń Áskerı akademııasyn támamdaǵannan keıin ol Áýe qorǵanysy kúshterine qyzmet ótkerý úshin keldi. Bul rette óziniń dene daıarlyǵyn jetildirýdi jalǵastyrdy.

Áskerılendirilgen kross boıynsha Qazaqstan Respýblıkasy Qarýly Kúshteriniń spartakıadasynda (júgirý, shaǵyn kalıbrli vıntovkadan oq atý, granata laqtyrý) sport sheberine úmitker normatıvin oryndady. 2016 jyldyń kókteminde 300 metrge júzý, Makarov tapanshasynan oq atý jáne 3 000 metrge júgirýde ofıtserlerdiń úshsaıysy boıynsha Áýe qorǵanysy kúshteriniń chempıonyna aınaldy. Ofıtserlerdiń úshsaıysy boıynsha Qazaqstan Respýblıkasy Qarýly Kúshteriniń spartakıadasynda 3 000 metr qashyqtyqqa júgirýde birinshi oryndy ıelendi.