QR Qarýly Kúshterine kúzgi shaqyrýǵa ázirlik bastaldy
TANA. 27 qyrkúıek. QazAqparat - Búgin QR Qorǵanys mınıstrliginde mınıstrdiń birinshi orynbasary - Shtabtar bastyqtary komıtetiniń tóraǵasy general-polkovnık Sáken Jasuzaqovtyń basshylyǵymen
aǵymdaǵy jylǵy kúzgi áskerı merzimdi qyzmetke shaqyrýǵa jatatyn azamattardy zerdeleý, kúzgi shaqyrý bastalýyna ázirlik qorytyndysy jáne alda turǵan mindetter jaıynda nusqaýlyq-ádistemelik sabaqtar ótti, dep habarlady vedomstvonyń baspasóz qyzmeti.
Sharaǵa jergilikti áskerı basqarmamlar, qorǵanys isteri jónindegi departamentter bastyqtary jáne olardyń orynbasarlary, medıtsınalyq shaqyrý komıssııalarynyń tóraǵalary, qorǵanys isteri jónindegi departamentterdiń psıhologtary men zańgerleri, sondaı-aq oblystar ákimderiniń orynbasarlary tartyldy.
«Qarýly Kúshter qataryna jastardy shaqyrý jáne olardy sapaly irikteý tutastaı alǵanda qazaqstandyq armııanyń jaýyngerlik daıarlyǵyn qamtamasyz etedi, - dep atap kórsetti S.Jazuzaqov. - Shaqyrý pýnktteriniń, sonyń ishinde medıtsınalyq komıssııalardyń jumystarynyń jarqyn kórinisi áskerlerden keri qaıtarylǵandardyń sany azaıyp otyrǵanynan aıqyn kórinedi».
Búginde áskerlerdiń jastarmen tolyǵýy jaman emes. Sapalyq quramy edáýir ózgerdi. Áskerge shaqyrylǵandardyń bilim deńgeıi de ósti, Bıylǵy kóktemge Qarýly Kúshter qataryna 14 myńnan astam adam shaqyrylǵan bolatyn, kúzde de osynsha adam shaqyrylmaq. Aǵymdaǵy jyldyń shaqyrý kórsetkishteri orta arnaýly jáne orta jáne joǵary bilimdi azamattar sanynyń quramy edáýir joǵarylaǵanyn kórsetti. Sondaı-aq áskerı-tehnıkalyq mektepterde oqýdan ótken shaqyrylýshylardyń qatary arta túsýde.
