QR Qarýly Kúshterine kelisimshart boıynsha áskerı qyzmetke qabyldaý júrýde

ASTANA. QazAqparat - El óńirlerinde kelisimshart boıynsha áskerı qyzmetke qabyldaý júrgizilýde. Búgingi kúni Qazaqstan Respýblıkasy Qarýly Kúshteriniń áskerı bólimderi men bólimshelerine qatardaǵy jaýynger jáne serjanttar quramynda kelisimshart boıynsha áskerı qyzmet ótkerý úshin 600-ge jýyq adam joldanyp, qabyldandy, dep habarlaıdy QazAqparat Qorǵanys mınıstrliginiń baspasóz qyzmetine silteme jasap.

«Áskerı qyzmet pen áskerı qyzmetshilerdiń mártebesi týraly» 2012 jylǵy 16 aqpandaǵy QR Zańyna sáıkes, kelisimshart boıynsha áskerı qyzmetke kiretin adamdarda QR azamattyǵy bolýy, kýrsanttar men ózge de sanattaǵy áskerı qyzmetshilerdi eseptemegende, 19 jastan kishi bolmaýy, áskerı-esepke alý mamandyǵynyń bolýy, áıelderdi qospaǵanda, merzimdi áskerı qyzmetti ótkerýi ne JOO-nyń áskerı kafedrasynda oqýdan ótýi nemese áskerı-oqytylǵan rezervti daıarlaý boıynsha Qorǵanys mınıstrliginiń mamandandyrylǵan uıymdarynda áskerı daıyndyqtan ótýi tıis.

Jergilikti áskerı basqarý organdary janyndaǵy áskerı qyzmetke qabyldaý pýnktterine qazaqstandyq armııanyń qataryn tolyqtyrýǵa nıet bildirgenderdiń sany tolastar emes. Olardyń deni QR QK QÁ Desanttyq-shabýyldaý áskerleriniń áskerı bólimderinde qyzmet etýge nıet bildiredi.

Kelisimshart negizinde qyzmet etý - áskerı qyzmetshilerdiń turaqty laıyqty jalaqy alýy, sondaı-aq birqatar artyqshylyqtarǵa ıe bolýy.