QR Qarýly Kúshterinde jazǵy jaýyngerlik oqýlar bastaldy
Osyǵan oraı, barlyq áskerı bólimder men mekemelerde jaýyngerlik oqýdyń qarqyndy jáne jaýapty kezeńin bildiretin saltanatty sapqa turý sharalary ótti. Bul týraly QR Qorǵanys mınıstrliginiń baspasóz qyzmetinen habarlandy.
2013 jylǵy jaýyngerlik saıystyń urany «Myqty Armııa - myqty Qazaqstan!» dep belgilendi. «QR Prezıdentiniń «Qazaqstan -2050 Strategııasy» atty Joldaýynda Qarýly Kúshterdiń aldynda turǵan basty mindet retinde ulttyq qorǵanys qabileti men áskerı doktrınany nyǵaıtý máselesine basa nazar aýdaryldy. Osyǵan oraı, qazirgi tańda Qazaqstan Qarýly Kúshterinde armııany kásibılendirý jumystary qolǵa alynyp, áskerı kadrlardy daıyndaý sapasy men talaptary arttyryldy. Sondaı-aq, jaýyngerlik daıyndyqtardyń deńgeıi ósip, qorǵanys ónerkásibi kesheni men zań shyǵarýshylyq árekettiń sheńberinde kóptegen jumys atqarylýda», - delingen baspasóz baıanynda.
«Bizdiń árqaısymyzda úlken qajyrlylyq pen maqsatqa degen umtylys bolýy kerek. Al jaýyngerlik daıyndyqtyń deńgeıin jetildirýge eń aldymen, kásibılik pen jeke oryndaýshylyq tártip basa qajet»,- dedi saltanatty jıynda Qazaqstan Qarýly Kúshteri Bas shtabynyń bastyǵy general-polkovnık Sáken Jasuzaqov.
Onyń aıtýynsha, jańa oqý kezeńi barysynda áskerı qyzmetshiler aldynda jaýyngerlik daıarlyq deńgeıin arttyrý mindeti tur. Sondyqtan da, áskerı vedomstvonyń basshylyǵy «Myqty Armııa - myqty Qazaqstan!» atty jaýyngerlik saıysynyń jyldyq urany óz mazmunyn aqtap, sarbazdar oqý jylyn sapaly kórsetkishtermen aıaqtaıtynyna senim bildirdi.