QR Qarýly kúshterinde myńnan astam tárbıeshi-ofıtser jumys isteıdi

ASTANA. QazAqparat - Búgin Qazaqstan Qarýly Kúshteri tárbıeshileriniń ınstıtýty óziniń qurylǵana 26 jyl tolýyn atap ótýde. Bul týraly QR Qorǵanys mınıstrliginen málim etti, dep habarlaıdy QazAqparat tilshisi.

1993 jyldyń 19 qańtarynda Elbasynyń Jarlyǵymen qazaqstandyq armııada komandırlerdiń tárbıe jáne áleýmettik-quqyqtyq jumystar jónindegi orynbasarlarynyń ınstıtýty quryldy. Osy sátten bastap Qarýly Kúshterdiń qalyptasýy jáne damýymen baılanysty tárbıe jumystary organdarynyń tarıhy bastaý aldy. Búginde Qazaqstannyń Qarýly Kúshterinde myńǵa jýyq tárbıe qurylymdarynyń ofıtserleri - jeke qurammen jumys jasaýdaǵy barlyq deńgeıdegi mamandar, áskerı bólimderdegi ıdeologııalyq jáne psıhologııalyq jumys mamandary men QR Qorǵanys mınıstrliginiń áskerı oqý oryndary men oqý ortalyqtaryndaǵy oqytýshylar qyzmettik mindetterin atqaryp keledi.

26 jyl ishinde tárbıe qurylymdarynyń ofıtserleri komandırlermen birlese áskerı ujymdarda moraldyq-adamgershilik jaǵdaıdy qalyptastyrý, áskerı qyzmettiń bedelin arttyrý, jeke quramnyń abyroı men namysyn qorǵaýdy qamtamasyz etý, áskerı tártip pen quqyqtyq tártipti nyǵaıtý úshin qyrýar jumys atqardy. Alaıda, munymen tárbıeshiler ınstıtýty óziniń damýyn toqtatpaıdy. Jyl saıyn is-sharalardyń tutas kesheni iske asyrylady.

Qazirgi ýaqytta elimizdiń Qarýly Kúshterinde tárbıe jáne ıdeologııalyq jumystyń birtutas júıesi qalyptasqanyn senimmen aıtýǵa bolady. Qoǵamda áskerı qyzmetshiniń kásibi men áskerı qyzmettiń ósip kele jatqan bedeli, sondaı-aq áskerı ujymdardyń joǵary jaýyngerlik rýhy men jumylýy osynyń aıqyn dáleli.