QR Qarýly Kúshterinde Konstıtýtsııa kúnine arnalǵan merekelik is-sharalar ótýde

ASTANA. QazAqparat - Búgin Qazaqstan Respýblıkasynyń Ata Zańynyń 20 jyldyǵy keńinen toılanýda. Osy oraıda elimizdiń túrli óńirlerindegi Qazaqstan Qarýly Kúshterine qarasty Áskerı-teńiz kúshteriniń, Áýe qorǵanysy kúshteriniń jáne Qurlyq áskerleriniń áskerı bólimderi men quralymdarynda merekelik kontsertter, patrıottyq jıyndar, áskerı-sporttyq jarystar jáne otbasylyq is-sharalar ótip jatyr.

Atap aıtsaq, «Ońtústik» óńirlik qolbasshylyǵyna qarasty Taraz garnızonynyń Ofıtserler úıinde áskerı qyzmetshiler Múmkindigi shekteýli adamdardy emdeý jáne ońaltý ortalyǵynda merekelik kontsert uıymdastyrdy. Áýenderi júrekke jol tapqan tanymal qazaq sazgerleriniń patrıottyq ánderin ofıtserler shyrqady.

«30 tamyz - bul aıtýly kún, tutas memleketimizdiń jáne qazaqstandyq halyqtyń erekshe tarıhı kúni. Sondyqtan bul merekede barlyq qazaqstandyqtardyń, jastar men qarttardyń, sizdiń qamqorlyǵyńyz ben nazaryńyz asa qajet adamdarmen birigý óte mańyzdy», - deıdi Taraz garnızony Ofıtserler úıiniń bastyǵy aǵa leıtenant Aıman Smetova.

Dál osy ýaqytta Almaty qalasyndaǵy «Halyq» sporttyq saıabaǵynda QR Ata Zańynyń 20 jyldyǵyna ushtasqan jergilikti áskerı basqarý organdarynyń áskerı qyzmetshilerinen quralǵan segiz komanda arasynda shaǵyn fýtboldan birinshilik ótip jatyr.

Atap ótken jón, QR Konstıtýtsııasynyń 20 jyldyǵyn merekeleý 8 tamyz kúni QR Qarýly Kúshterinde «Ata Zańǵa adalmyz» atty patrıottyq aktsııasymen birge bastaldy. 30 tamyzǵa deıin jalǵasqan aktsııa Qaraǵandy, Aqtaý, Shymkent jáne Óskemen qalalaryndaǵy QR QK barlyq óńirlik qolbasshylyqtarynda ótti, dep habarlaıdy QR Qorǵanys mınıstrliginiń baspasóz qyzmeti.