QR Qarýly Kúshterinde Irakta qaza bolǵan bitimgershini eske aldy (FOTO)

ASTANA. QazAqparat - Búgin QR Qarýly Kúshterinde Irak Respýblıkasynda bitimgershilik mıssııany oryndaı otyryp, beıbit ýaqytta qaza bolǵan qazaqstandyq armııanyń birden-bir ofıtseri kapıtan Qaırat Qudabaevty eske alýda. Bul týraly QR Qorǵanys mınıstrliginiń baspasóz qyzmetinen habarlady.

Kapıtan Qaırat Qudabaev Qarýly Kúshterdegi qyzmeti barysynda óziniń batyldyǵyn, jaýapkershiligi men erligin kórsetti. Myńdaǵan beıbit turǵyndardyń qaýipsizdigin qamtamasyz ete otyryp, óziniń qarýlastaryn ajal aýzynan aman alyp qalyp, batyl erlik jasady. 2005 jyldyń 9 qańtarynda Iraktaǵy beıbitshilik mıssııany oryndaý kezinde Qazaqstan óziniń batyry, QR Qarýly Kúshteriniń sardary Qaırat Qudabaevtan aıyryldy.

«2004 jyly biz Qaıratpen bitimgershilik mıssııany oryndaý úshin Irakqa joldandyq. Qazaqstannan 8 áskerı qyzmetshi boldyq jáne Ýkraınadan 35-teı áskerı qyzmetshi boldy. Ol jerde biz jerdi tazartý jáne mınalar men oq-dárilerdi joıýmen aınalystyq. Mıssııa óte kúrdeli boldy, tynyshtyq qashqan almaǵaıyp kezeń boldy. Qaırat uıymdasqan, saýatty ofıtser boldy. Qarýlastaryna únemi qolushyn sozýǵa daıyn turatyn. Ol aǵylshyn tilin biletin, jasaq komandırimen sheteldiktermen ótetin brıfıngter men keńesterge qatysatyn. 2005 jylǵy 9 qańtarda biz jerdi oq-dárilerden tazartý úshin kezekti ýchaskege bardyq. Operatsııa kezinde jarylys oryn aldy. Kapıtan Qaırat Qudabaev bizdi jarylys oshaǵynan ıterip jiberip, qutqaryp qaldy. Erlikpen qaza tapty. 2016 jyldyń 19 sáýirinde ol 41 jasqa tolar edi. Qaırattyń erligin biz eshqashan umytpaımyz», - dedi kapıtan Qaırat Qudabaevtyń qyzmettesi, 61993 áskerı bólimi komandıriniń orynbasary ulan maıory Asqar Smaǵulov.

Áskerı jáne qyzmettik mindetin oryndaý kezinde kórsetken batyldyǵy men qaısarlyǵy úshin Qazaqstan Respýblıkasy Prezıdentiniń Jarlyǵymen kapıtan Qaırat Qudabaev qaıtys bolǵannan keıin birinshi dárejeli «Aıbyn» ordenimen jáne Polsha, Ýkraına, AQSh Qarýly Kúshteriniń kóptegen ózge de nagradalarymen marapattaldy.

Búgin Almaty men Qapshaǵaıda Qazaqstan Qarýly Kúshteriniń áskerı qyzmetshileri estelik sharalar ótkizdi. Áskerı qyzmetshiler 32363 áskerı bóliminde ornalasqan Qaırat Qudabaevtyń músinine gúl shoqtaryn qoıdy. Sondaı-aq bólim aýmaǵynda qaza bolǵan ofıtserdi eske alý buryshyn ashty. QR QK Aeroutqyr áskerleriniń qolbasshysy general-maıor Almaz Jumakeevtiń basshylyq etýimen B. Momyshuly atyndaǵy respýblıkalyq áskerı mektep-ınternatynda Qaırat Qudabaevty eske alý kúni ótti. Onda «Bitimgershiler» fılmi kórsetilip, opat bolǵan ofıtserge arnalǵan kontsert ótkizildi.