QR Qarýly Kúshterinde áskerılendirilgen krosstan ótken chempıonattyń jeńimpazdary anyqtaldy
Óńirlik qolbasshylyqtardyń, basqa áskerler men áskerı quramalardyń áskerı qyzmetshileri QR Qarýly Kúshteriniń qurama qomandasyna kirý úshin saıysqa túsýde. Jeńimpazdardan quralǵan komanda TMD elderi arasyndaǵy áskerılendirilgen krossqa qatysady.
Qatysýshylar jarys barysynda jeke top synaǵy boıynsha 1500 jáne 3000 metrge júgirýden, BI-7 az kalıbrli myltyǵynan atýdan jáne F-1 granatyn alysqa laqtyrýdan saıysqa tústi.
Birinshi kúngi jarystyń qorytyndysy boıynsha jeke synaqta Chempıonattyń jeńimpazdary men júldegerleri anyqtaldy. Áıelder arasyndaǵy jarysta birinshi oryndy «Astana» óńirlik qolbasshylyǵynyń áskerı qyzmetshisi kishi serjant L.Gýbareva jeńip alsa, ІІ oryndy - serjant A.Jákenova («Shyǵys» óńirlik qolbasshylyǵy), ІІІ oryndy - qatardaǵy jaýynger Sh.Serjanova («Ońtústik» óńirlik qolbasshylyǵy) ıelendi.
Birinshi jáne ekinshi orynǵa ıe bolǵan qatysýshylar arasyndaǵy aıyrma tek eki mınýtty quraǵanyn aıta ketken jón. «Men únemi ózimdi symbatty, shynyqqan kúıde ustaýǵa tyrysamyn. Áskerılendirilgen krossqa 2 aı daıyndaldym. Laqtyrý men tózimdiliktiń jyldamdyǵyn damytýǵa degen qajyrlylyq jáne kúshti daıarlyqtyń qorytyndysy óz nátıjesin berdi», - dedi Lıýdmıla Gýbareva.
Er azamattar arasynda jeke synaqta úzdik shyqqan «Ońtústik» óńirlik qolbasshylyǵynyń áskerı qyzmetshisi, kishi serjant D.Barlybaev. Al ІІ oryndy - kishi serjant J.Raqymǵazy (Aeroutqyr áskerleri), ІІІ oryndy - leıtenant V.Romanov (14776 áskerı bólimi) ıelendi.
Birinshi kúnniń qorytyndysy boıynsha 5 áskerı qyzmetshi dene daıarlyǵynyń joǵarǵy kórsetkishi bolyp sanalatyn áskerılendirilgen kross boıynsha sport sheberi kandıdatynyń razrıadyn oryndady.
Jarystyń ekinshi kúninde ótken estafeta barysynda komandalar 1000 jáne 1500 metrge júgirýden jáne BI-7 az kalıbrli myltyǵynan atýdan saıysty. Áskerılendirilgen estafetanyń jeńimpazdary Aeroutqyr áskerleriniń áskerı qyzmetshileri, sondaı-aq ІІ oryn - «Ońtústik» óńirlik qolbasshylyǵyna, ІІІ oryn - «Shyǵys» óńirlik qolbasshylyǵyna buıyrdy. «Bizdiń komanda eki aı boıy aıanbaı daıyndaldy. Oqý-jattyǵý barysynda biz oıly-qyrly jáne taýly jerlerden júgirýge daıyndalý nátıjesinde jaqsy nátıje kórsettik. Daıyndyqtyń arqasynda estafetada joǵarǵy nátıjege qol jetkizdik», - dep Aeroutqyr áskerleriniń kishi serjanty Raýan Ábilhanov atap ótti.
Jalpy komandalyq synaqta jarystyń chempıondary «Shyǵys» óńirlik qolbasshylyǵynyń áskerı qyzmetshileri atandy, al ІІ oryndy Aeroutqyr áskerleri, ІІІ oryndy - «Ońtústik» óńirlik qolbasshylyǵy aldy. «Bir aı boıy jattyǵýdyń barysynda tabandy tózimdilikke úırendik jáne aralyq júgirýdi oryndadyq.
Sondaı-aq atysta qajyrlylyq tanyttyq, sebebi júgirýden soń demalý qıyndap, atý ońaıǵa soqpaıdy», - dedi «Shyǵys» óńirlik qolbasshylyǵynyń dene daıarlyǵy boıynsha bastyǵy maıor Ábetaev Tólegen. Chempıonattyń qorytyndysy boıynsha QR Qarýly Kúshteriniń qurama komandasy belgili boldy.
Atalǵan komanda aǵymdaǵy jyldyń qyrkúıek aıynda TMD elderi arasynda ótetin áskerılendirilgen kross boıynsha Chempıonatqa qatysatyn bolady. Aldaǵy Chempıonatqa TMD elderinen 10-ǵa jýyq memleket qatysady dep kútilýde.
