QR Qarýly Kúshterinde áskerı rezerv daıarlaý jónindegi jumys jalǵasýda

ASTANA. 27 qarasha. QazAqparat - QR Qarýly Kúshterinde áskerı rezerv daıarlaý jónindegi jumys jalǵasýda. Qaraǵandy oblysyndaǵy «Spassk» oqý-jattyǵý ortalyǵynda 100-ge jýyq adam áskerı oqytylǵan rezervti daıarlaý jónindegi jıynǵa qatysty. Olardyń ishinde túrli mamandyq pen kásip ıeleri bar. Jıynnan ótý kezeńinde olardyń jumys oryndary saqtalyp, memleket esebinen aılyq ortasha jalaqylary tólenedi.

Bul osy oqý ortalyǵynda jyl basynan beri ótkizilgen toǵyzynshy jıyn.
2013 jyly osy oqý-jattyǵý ortalyǵynda Soltústik Qazaqstan, Qyzylorda, Aqmola, Qostanaı oblystarynan jáne Astana qalasynan kelgen áskerı mindettiler daıarlyqtan ótti.

Bir aılyq baǵdarlama boıynsha bastapqy áskerı istiń álipbıimen teorııalyq tanystyrý júrgiziledi. Sodan soń shaqyrylǵan azamattar ant qabyldaıdy. Jıyn barysynda áskerı mindettilermen taktıkalyq, ınjenerlik, memlekettik-quqyqtyq, dene jáne atys daıarlyǵy boıynsha teorııalyq jáne praktıkalyq sabaqtar ótkiziledi.

Daıarlyq qorytyndysy boıynsha áskerı mindettiler arnaıy kýálik alady, bul olarǵa kelisim-shart boıynsha áskerı qyzmetke qabyldaný quqyǵyn beredi.

2013 jyly 5 oqý-jattyǵý ortalyǵynyń bazasynda 8000-nan astam respýblıka azamaty, sonyń ishinde 300-ge jýyq ofıtser jıynnan ótti, dep habarlady QR Qorǵanys mınıstrliginiń baspasóz qyzmetinen.