QR Qarýly Kúshteri Jeńistiń 70 jyldyǵyna arnalǵan «Máńgi esimizde» aktsııasyn qorytyndylady
Bul sýrettegiler qazaqstandyq áskerı qyzmetshiler jáne olardyń Uly Otan soǵysyna qatysqan týystary, dep habarlaıdy QR QM baspasóz qyzmeti.
Elimizde ótkizgen «Máńgi esimizde» aktsııasy biregeıligimen erekshelenedi. Bul is-shara qazaqstandyq birneshe býynnyń, qazirgi áskerı qyzmetshiler men olardyń batyr týystarynyń basyn qosyp, surapyl soǵystaǵy jańa batyrlar esimin, olar jasaǵan qaıtalanbas tarıhı taǵdyrlaryn bilýge múmkindik berdi.
«Búgin biz erekshe oqıǵaǵa oraı Uly Jeńis kúni men Otan qorǵaýshy kúni qarsańynda qasıetti jerge - Máńgilik alaýǵa jınaldyq. Uly Otan soǵysyndaǵy Jeńis bizge sansyz qaıǵy-qasiret pen qurbandyqtyń qunymen keldi. Biz qurban bolǵandar týraly estelikti qasterleımiz. Sizderdi Uly Jeńis kúni jáne Otan qorǵaýshy kúnimen shyn júrekten quttyqtaımyn! Búgin «Máńgi esimizde» atty aktsııanyń aıasynda Qazaqstan Respýblıkasy Qarýly Kúshteriniń áskerı qyzmetshileri Uly Otan soǵysyndaǵy Jeńistiń 70 jyldyǵyna arnap jeńil atletıkadan júgirý ótkizedi. Bul bizdiń batyrlarymyzdyń máńgi óshpeıtin dańqyna qurmet kórsetý», - dedi QR QK Bas shtaby bastyǵynyń orynbasary general-maıor Muqan Dúısekeev.
Qarýly Kúshterde qańtar aıynda bastalǵan «Máńgi esimizde» aktsııasy birneshe aı ishinde elimizdiń barlyq óńirlerindegi myńnan asa áskerı qyzmetshilerdi biriktirdi. Osy oraıda aktsııaǵa qatysýshylar ózderiniń otbasylyq muraǵattarynan sýretter jiberip, 1941-1945 jyldary Uly Otan soǵysynyń urys dalasynda shaıqasqan týystary men tanystary týraly erekshe tarıh jóninde áńgimelep berdi. Atalǵan bannerdi jasaýǵa qatysýshylardan barynsha qyzyqty 130 sýret iriktelip alyndy.
Saltanatty rásimnen keıin 450-den asa áskerı qyzmetshi jaqyn qalǵan aıtýly kúnniń qurmetine Baýyrjan Momyshuly eskertkishine deıin úsh shaqyrym jerge júgirdi.
