QR Qarýly Kúshteri jeke quramynyń 100 paıyzy qorytyndy tekseriske tartylady - QR QM (FOTO)

ASTANA. QazAqparat - Qazaqstan Respýblıkasynyń Qarýly Kúshterinde 2015 oqý jyly boıynsha áskerlerdi qorytyndy tekserý bastaldy. Tekseriske Qazaqstan áskeriniń 100% jeke quramy tartylady, dep habarlady QR Qorǵanys mınıstrliginiń baspasóz qyzmetinen.

Onyń nátıjeleri boıynsha, ásker túrleri men tekteriniń úzdik quralymdary anyqtalady. «Іs-shara aýqymdy, qatardaǵy jaýyngerden bastap generalǵa deıin barlyq Qarýly Kúshterin qamtıdy. Árbir áskerı qyzmetshi óziniń dalalyq daǵdysyn, 2015 oqý jylynda barlyq qol jetkizgen jetistigin kórsetedi. Tekserý qorytyndysy boıynsha biz nátıjelerdi anyqtaımyz, úzdik quralymdar, úzdik áskerı bólimder, úzdik áskerı qyzmetshiler aıqyndalady. Tekseris atys daıarlyǵy, jaýyngerlik mashınalardy júrgizý, dene daıarlyǵy, memlekettik-quqyqtyq daıarlyq jáne kásibı men komandırlik daıarlyqty mindetti túrde bilýine kiretin qalǵan pánder boıynsha ótedi. Qorytyndy tekseris jyl saıyn, jylyna bir ret ótkiziledi», - dedi QR QK Bas shtaby Jaýyngerlik daıarlyq departamenti Qarýly Kúshterdiń jaýyngerlik daıarlyǵyn esepke alý jáne baqylaý basqarmasynyń bastyǵy polkovnık Abaı Jumaǵulov. 2015 oqý jylynda Qarýly Kúshterdegi jaýyngerlik saıystyń urany «Uly Jeńiske degen bizdiń jetistikterimiz» bolyp tabylǵanyn aıta keteıik. Qazaqstan Respýblıkasynyń Qarýly Kúshterinde qorytyndy tekseris 2015 jylǵy qarasha aıynyń sońyńa deıin jalǵasady. Qorytyndy tekseristiń nátıjeleri negizinde QR QK áskerı bólimderiniń jaýyngerlik ázirligi men olardyń qoıylǵan tapsyrmalardy oryndaý qabilettiligin jetildirý jóninde ári qaraı baǵyttar anyqtalatyn bolady.