QR Qarýly Kúshteri oqý-jattyǵý dabylynyń belgisi boıynsha joǵary ázirlik deńgeıine keltirildi (FOTO)

ASTANA. QazAqparat - Búgin tańerteń QR Qarýly Kúshteri jaýyngerlik ázirliktiń joǵary deńgeıine keltirildi. Óńirlik qolbasshylyqtardyń, Aeroutqyr áskerlerdiń, QR Qarýly Kúshteri barlyq túrleriniń áskerleri oqý-jattyǵý dabylynyń belgisi boıynsha kóterildi, dep habarlaıdy QR Qorǵanys mınıstrliginiń baspasóz qyzmetinen.

«Bas shtabtyń komandasy boıynsha Qurlyq áskerleriniń toptamasy oqý-jattyǵý ortalyqtary men polıgondarda jattyǵý-jaýyngerlik mindetterdi atqarýǵa kiristi. Bul is-qımyldarǵa 4 myńǵa jýyq qarý-jaraq pen áskerı tehnıka tartyldy», delingen habarlamada.

Áýe qorǵanysy kúshteri quramynan jaýyngerlik kezekshilik atqaratyn kúshter men quraldar áýege kóterilip, 100-den astam túrli avıatsııalyq tehnıkanyń qozǵaltqyshtary iske qosyldy, zapas áýeaılaqtar paıdalanýǵa ázirlendi. Áskerı-teńiz kúshteriniń kemeleri kemege qarsy, áýe shabýylyna qarsy, sý asty dıversııasyna qarsy oqý-jattyǵý mindetterin pysyqtaý úshin teńizge shyqty.

Qarýly Kúshter toptamasynyna jalpy basshylyqty Strategııalyq basqarý ortalyǵynan QR Qarýly Kúshteri Bas shtabynyń bastyǵy, general-polkovnık Sáken Jasuzaqov júrgizdi.

Júrgizilgen sabaqtardyń maqsaty - basqarý organdary men jeke quramnyń qoıylǵan mindetterdi belgilengen merzimde atqarýdaǵy úılesimdiligin arttyrý bolyp tabylady.