QR Qarýly Kúshteri qatarynda Aýǵan soǵysynyń 100-ge jýyq ardageri bar (FOTO)
Bul týraly QR QM baspasóz qyzmeti habarlady.
Búgingi kúni Qazaqstan Respýblıkasynyń Qarýly Kúshterinde Aýǵan soǵysyna qatysqan 100-ge jýyq adam bar. Olar ofıtserlik, serjanttyq jáne azamattyq personal laýazymdarynda áskerı qyzmet ótkerýde jáne qazaqstandyq armııanyń ıgiligi úshin óz mindetterin abyroımen atqaryp júr.
Elimizdiń barlyq aýmaǵynda osy ataýly kún qarsańynda birneshe saltanatty merekelik is-sharalar ótkizilýde. Almatydaǵy 28 gvardııashy-panfılovshylar saıabaǵynda 200-den asa áskerı qyzmetshi Aýǵanstanda qaza bolǵan jaýyngerlerge qurmet kórsetti. Іs-sharaǵa 61993 áskerı bóliminiń tý ustaýshy toptary, Qurlyq áskerleri men Radıoelektronıka jáne baılanys áskerı ınstıtýttarynyń kýrsanttary, «Jas ulan» áskerı mektebiniń tárbıelenýshileri, áskerı úrmeli orkestr, qurmet qaraýyly rotasy, QR QK Aeroutqyr áskerleri men Ulttyq ulannyń áskerı qyzmetshileri qatysady.
Desantshylar qoıan-qoltyq urystyń elementterin kórsetedi, áskerı qyzmetshiler gúl shoǵyn qoıyp, bir mınýt únsizdikten keıin mıtıngti bastaıdy.
Astanada saltanatty shara Halyq qaharmany Baqytjan Ertaevtyń qatysýymen QR QK Ulttyq áskerı-patrıottyq ortalyǵynda ótýde. Kontserttik baǵdarlamaǵa ortalyq ansambl, áskerı orkestrdiń qoldaýymen QR QK ardagerleri, Aýǵan soǵysynyń ardagerleri, «Jas ulan» mektebiniń tárbıelenýshileri atsalysty.
Tarazdaǵy garnızondyq ofıtserler úıinde saltanatty is-shara ótti. Qazaqstandyq respýblıkalyq Aýǵan soǵysyndaǵy múgedekter qoǵamy basqarmasynyń tóraǵasy Altaı Sarmoldaev Aýǵan soǵysynyń ardagerleri men Tájik-Aýǵan shekarasyndaǵy shaıqasqa qatysqandarǵa nagradalar tabys etti.
Atalmysh sharaǵa arnalǵan jappaı júgirý «Astana» óńirlik qolbasshylyǵynda ótti. Oǵan 31775, 36352, 55524 áskerı bólimderiniń 400-ge jýyq áskerı qyzmetshisi qatysty. Saltanatty is-sharany «Astana» óńirlik qolbasshylyǵy áskerleriniń qolbasshysy general-maıor Sultan Kamaletdınov ashty. Odan basqa, oqýshylardyń qatysýymen erlik sabaqtary ótkizildi.
Áskerı qyzmetshiler men oqýshylar ınternatsıonalıst jaýyngerlermen kezdesti, sol qıyn-qystaý kezeńdi eske alyp, jaýyngerlerimizdiń Otan aldyndaǵy boryshtaryn qalaı adal ári erjúrektilikpen ótegenderin estip bildi.
Áskerı qyzmetshilerdiń pikirinshe, sol bir surapyl soǵystyń bizge bergen ónegesi búgingi kúni de aıryqsha mánge ıe jáne urpaqqa úlgi bolarlyqtaı tálimi mol. «Aýǵanstan - bul áskerı boryshqa degen adaldyqtyń joǵary sezimi. Generaldar men ofıtserler erlik pen batyrlyqty kórsetti, alaıda, erliktiń eń bir tamasha jarqyn kórinisin qatardaǵy jaýynger sarbazdar kórsetken edi. Myńdaǵan bizdiń sarbazdarymyz batyr atandy: komandırlerdiń keýdesin jaýyp, ottyń qursaýynda qalǵan jaralylardy qutqardy, sarbazdarymyzǵa ǵana tán erlikke toly erekshe qasıetterin pash etti», - deıdi ardagerler.
