QR IJTM bıýdjettik uıymdarda energomenedjer laýazymyn engizýdi usyndy
ASTANA. 25 qyrkúıek. QazAqparat - QR Indýstrııa jáne jańa tehnologııalar mınıstrligi bıýdjettik uıymdarda energomenedjer laýazymyn engizýdi usynady.
Bul týraly búgin elordada ótip jatqan «Jergilikti deńgeıde energomenedjment júıesin engizý múmkindigi» taqyrybyndaǵy dóńgelek ústel barysynda atalǵan mınıstrlikke qarasty Energııa únemdeý jáne energııa tıimdiligi basqarmasynyń bastyǵy Álibek Qalybaı málim etti.
«Turǵyn úı-kommýnaldyq sektor men bıýdjettik sektor energııa únemdeýde zor áleýetke ıe. Qazaqstan Úkimeti 2011 jyldyń 30 qarashasynda energııa únemdeýdiń keshendi josparyn qabyldady. Onda jergilikti jerlerde energomenedjment júıesin engizý boıynsha keshendi is-sharalar qamtylǵan. Álemdik tájirıbeni esersek, bul óńirlerde enrgııa únemdeýdegi memlekettik saıasatty júzege asyrýdyń shyn mánindegi tetigi bolyp tabylady», - dedi ol.
Sondyqtan da onyń paıymynsha, bıýdjettik uıymdarda energomenedjment laýazymyn shtattyq kestege engizý kerek. Al olar óz keziginde energııa únemdeýmen jáne usynystar ázirleýmen aınalysýy tıis. Sonda ǵana jergilikti jerlerde energııa únemdeýdi damytý problemasyn sheshýge bolady.
Sondaı-aq dóńgelek ústel barysynda mamandar óńirlik energomenedjmenttiń álemdik tájirıbesin talqylap, energııa únemdeýdi basqarýdyń júıeli sharalaryn ortaǵa saldy.
