QR Іshki ister mınıstri Almatydaǵy terakt týraly egjeı-tegjeıli habardar etti
«Búgin Almatyda terrorlyq akt oryn aldy. Ókinishke qaraı, taǵy da adamdar qaza tapty. Men qaza tapqan polıtseılerdiń otbasylaryna kóńil aıtamyn. Osy otbasylarǵa kómek berý úshin tıisti jergilikti organdarǵa zań aıasynda barlyq sharany qolǵa alýdy tapsyramyn. Maǵan oqıǵa barysyn baıandap berińizder deımin, alda qandaı is-áreketti qolǵa alatynymyzdy josparlaý úshin. Іshki ister mınıstri Qalmuhambet Qasymov pen Ulttyq qaýipsizdik komıtetiniń tóraǵasyn tyńdaǵym kelip otyr»,-dedi Nursultan Nazarbaev.
Birinshi bolyp, QR Іshki ister mınıstri Qalmuhanbet Qasymov Prezıdentke Almaty oqıǵasynyń tolyq hronologııasyn málim etti.
«Búgin tańǵy saǵat 10.54-te belgisiz bireý Almaty aýdandyq ishki ister basqarmasyna kelgen. Postyda otyrǵan polıtsııa qyzmetkeri onyń qujatyn suraǵanda, qylmysker tapanshasyn alyp shyǵyp, oǵan eki ret oq atqan. Polıtsııa qyzmetkerin jaralaǵan soń, qylmysker onyń qarýyn alyp, kezekshi bólimge qaraı birneshe ret oq atqan. Aýdandyq ishki ister bóliminiń aýlasynda turǵan adamdarǵa qaraı taǵy birneshe ret qarý kezengen. Sol jerde tórt polıtsııa qyzmetkeri men bir qarapaıym adam jaraqat aldy. Bul jaraqat alǵan adam bizdiń burynǵy qyzmetkerimiz, qazir zeınette júrgen adam edi. Osydan keıin qylmysker kóshege júgirip shyǵyp, kólik toqtatady da kólikke otyryp ketedi. Basynda qylmysker dep anyqtaǵan ekinshi adamymyz qysym kórip, Baızaqov atyndaǵy kóshege barýǵa májbúr bolǵan eken. Qylmysker shaqyrý boıynsha kele jatqan patrýldik polıtsııaǵa oq atqan jáne Ulttyq qaýipsizdik komıteti departamentiniń ǵımaratyna kelip, taǵy bir patrýldik kólikke oq jaýdyrǵan. Osylaısha, taǵy eki qyzmetkerimizdi jaralady. Artynsha, ol oqıǵa ornynan qashyp ketken. Qazir ony taptyq. Qashqannan soń ol taǵy bir avtokólikti toqtatyp, Shekara qyzmetiniń aǵa leıtenanty otyrǵan kólikpen Abaı atyndaǵy kóshege deıin jetip qalmaqshy bolǵan. Alaıda, shekara qyzmetiniń ókili qarsylyq tanytqan. Ol úshinshi mekenjaıǵa barǵan shaǵynda bizdiń qyzmetkerlermen atysqan. Bir qyzmetkerimiz qaza tapty, ekinshi qyzmetkerimiz qylmyskerdi jaralap, onyń qolyna kisen saldy. Barlyq qarý tárkilendi.
Bizdiń qyzmetkerlerge oq atqan tapanshany Almaty aýdandyq ishki ister bóliminiń janynan taptyq. Ótken túnde, saǵat 03.52-de bul adam bir áıeldi óltirgen. Kýágerlerdiń aıtýynsha, qylmysker túnde jeńil júristi áıeldermen sózge kelgen, bir áıel Ózbekstan eliniń azamaty eken. Ol jeńil júristi áıel otyrǵan kólikke kelip, taksı júrgizýshisinen kóliktiń jaryǵyn qosýdy suraıdy, taksıst aıtqanyn oryndamaǵan soń, ol búgin qylmys jasaǵan qarýmen atqan. Sóıtip, kólikti aıdap áketken. Ol kólikti biz qaza bolǵan áıeldiń denesimen birge taptyq»,-dedi Q.Qasymov.
