QR Irandaǵy elshiligi shuǵyl baılanys tártibi men elden ketý múmkindikterin túsindirdi
ASTANA. KAZINFORM - Taıaý Shyǵys óńirindegi geosaıası ahýaldyń kúrt shıelenisýine baılanysty Iran aýmaǵynda ýaqytsha nemese turaqty negizde júrgen Qazaqstan Respýblıkasynyń azamattaryna jeke qaýipsizdik sharalaryn barynsha kúsheıtý qajettigi eskertiledi.
Osyǵan baılanysty otandastarymyzdan tómendegi usynymdardy qatań saqtaýdy suraımyz:
— adam kóp jınalatyn oryndarǵa barýdan jáne buqaralyq is-sharalarǵa qatysýdan bas tartý;
— jergilikti bılik organdary men resmı aqparat kózderiniń habarlamalaryn turaqty túrde qadaǵalaý;
— qajetsiz saparlardy shekteý;
— jeke qujattardy árdaıym ózińizben birge alyp júrý;
— týyndaýy múmkin tótenshe jaǵdaılarǵa daıyn bolý;
— Qazaqstan Respýblıkasynyń dıplomatııalyq ókildikterimen turaqty baılanysta bolý.
Qazaqstan Respýblıkasynyń Iran Islam Respýblıkasyndaǵy Elshiligi Iran aýmaǵynda júrgen Qazaqstan azamattary úshin táýlik boıy jumys isteıtin jedel baılanys jelilerin iske qosty.
Qazaqstan Respýblıkasynyń Tegeran qalasyndaǵy Elshiligi:
Elshiliktiń kezekshi telefony: +98 21 2256 5933
Mobıldi telefon / WhatsApp: +98 936 208 4672
Qazaqstan Respýblıkasynyń Gorgan qalasyndaǵy Bas konsýldyǵy:
+98 912 298 0350 (uıaly telefon);
+98 173 252 0443 (jumys telefony);
+7 701 771 34 01 (WhatsApp).
Qazaqstan Respýblıkasynyń Bender-Abbas qalasyndaǵy Konsýldyǵy:
+98 930 298 57 03 (uıaly telefon, WhatsApp).
Atalǵan baılanys arnalary arqyly azamattar konsýldyq kómekke júginip, ózderiniń ornalasqan jeri men jaǵdaıy týraly habarlaı alady.
— Óz qaýipsizdigińizge jaýapkershilikpen qarap, sabyr saqtaýǵa jáne tek resmı derekkózderge súıenýge shaqyramyz.
Sondaı-aq Iran Islam Respýblıkasynyń áýe keńistiginiń jabylýyna jáne áýe qatynasynyń ýaqytsha toqtatylýyna baılanysty Iran aýmaǵynan shyǵý máselesin Iran–Ázerbaıjan, Iran–Armenııa, Iran–Túrkııa jáne Iran–Túrikmenstan arasyndaǵy qurlyq shekaralary arqyly pysyqtaý maqsatynda joǵaryda kórsetilgen Qazaqstan Respýblıkasynyń dıplomatııalyq ókildikterimen baılanysqa shyǵýlaryńyzdy suraımyz, — delingen SІM habarlamasynda.
