QR Indýstrııa vıtse-mınıstri Armenııadan jetkizilgen kólikterge qatysty pikir bildirdi
NUR-SULTAN. QazAqparat – QR Indýstrııa jáne ınfraqurylymdyq damý vıtse-mınıstri Amanııaz Erjanov Armenııadan jetkizilip jatqan avtokólikterge qatysty pikir bildirdi, dep habarlaıdy QazAqparat tilishisi.
«Biz ózimizdiń aqparattyq arnalarymyz arqyly AQSh-tan Armenııaǵa shamamen 60 myń avtokólik jetkizilgenin bilemiz. Endi olar bul kólikti elderine kirgizdi, bizde biryńǵaı Kedendik tarıf bar. Degenmen, olar kólikterdi ózderinde qaldyrýy tıis. Al barsha Kedendik odaqqa taratý úshin bizdiń azamattar Armenııada ýaqytsha turǵylyqty jerdi rásimdep, Armenııanyń azamattarymen qatar osy mashınalardy satyp alady. ıAǵnı eshbir qosymsha baj salyǵynsyz kólikterdi Qazaqstanǵa armıandyq nómirlerimen kirgizip, osynda emin-erkin júr», - dedi A. Erjanov Úkimet úıinde ótken baspasóz máslıhatynda.
Onyń sózine qaraǵanda, bul óz kezeginde qazaqstandyq jol polıtseıleri úshin problema týdyrady.
«Olardy jaýapkershilikke tarta almaıdy. Atap aıtqanda, osy nómirmen júrgen kólikter joldaǵy jyldamdyqty asyryp, jol erejesin buzsa da, osy úshin eshqandaı jaýapkershilikke tartylmaıdy. Sonymen birge, aıyppul tólemeıdi, sotqa tartylmaıdy. Mundaı kólikter kóptep kirgizilse, onda bizdiń jeńil kólik óndirisin arttyrý boıynsha jumystarymyz jáne avtonesıeleý boıynsha sharalarymyz bosqa qalady», - dedi vıtse-mınıstr.
Onyń sózine qaraǵanda, Armenııada avtokólikti eki ese arzan baǵamen alýǵa bolady. Sonymen qatar vıtse-mınıstr osyndaı avtomobılderdi satyp alýǵa qatysty memleket tosqaýyl qoımaıtynyn atap ótti.
«Bul baǵytta qarsy sharalar qabyldanbaıdy. Eger de el azamattary osyndaı mashınalardy alǵysy kelse, onda qarsy qadamdardy qabyldaýdyń reti joq. Kerisinshe, osynyń barlyǵy zańdy bolýy úshin sheshim qabylaý kerek, ıaǵnı aldaǵy ýaqytta bizdiń azamattarda zań aldynda, quqyq qorǵaý organdary aldynda problemalary bolmas úshin. Armenııada ýaqytsha tirkeýge turý arqyly mashına satyp alyp, ony elimizge tranzıttik nómirmen kirgizý kerek emes. Odan da kólikti alyp kelip, tirkeýge qoıyp, zańdy túrde júrgen durys bolar. Óıtkeni qazirgi kezde olar osynda da, Armenııada da salyq tólep jatqan joq», - dedi ol.
