QR ІІM júrgizýshi kýáligin joǵaltqandarǵa keńes berdi
Bul jaıyndaǵy málimetterdi vedomstvo Feısbýktegi akkaýntynda jarııalandy.
Birinshi kezekte ІІM ókilderi júrgizýshi kýáligin (JK) urlansa, urlyq týraly ótinishpen polıtsııaǵa júginý kerektigin, onda tıisti anyqtama beriletindigin habarlap otyr. Bul óz kezeginde kýálikti qalpyna keltirý úshin qajet bolady.
«Mysal retinde aıtatyn bolsaq, jeke kýálikter jıi urlanady, sebebi biz barlyq qujattarymyzdy bir ámııanǵa salyp júremiz (bulaı isteýge múldem bolmaıdy!). Eń aldymen, jeke kýáligińizdi qaıta jasatý kerek, óıtkeni ol qujatsyz siz júrgizýshi kýáligin ala almaısyz. Eger tek júrgizýshilik qujatty ǵana joǵaltyp alsańyz, mundaı anyqtama qajet emes»,-delingen habarlamada.
Sonymen, JK-ni qalpyna keltirý úshin mamandandyrylǵan HQKO-ǵa nemese ákimshilik polıtsııanyń emtıhan-tirkeý bólimine júginý kerek.
Joǵalý sebebine baılanysty JK alý úshin mynadaı qujattar usynylady:
1) JK alýǵa toltyrylǵan blank (ótinish) ‒ Mamandandyrylǵan halyqqa qyzmet kórsetý ortalyǵynda (MHQKO) ol qajet emes, óıtkeni ony MHQKO qyzmetkeri avtomatty túrde toltyrady;
2) jeke basty kýálandyratyn qujat;
3) mekenjaı anyqtamasy ‒ MHQKO-da ol da qajet emes, óıtkeni suraý salý avtomatty túrde óńdeledi;
4) medıtsınalyq anyqtama jáne onyń kóshirmesi (Astananyń MHQKO-da medkomıssııany sol jerde ótýge bolady);
5) memlekettik baj tólengenin rastaıtyn qujat (túbirtek, qazirgi ýaqytta JK berý úshin tólenetin memlekettik baj somasy 2836 teńgeni quraıdy).
Shetel azamattary men azamattyǵy joq adamdar úshin Qazaqstan Respýblıkasy SІM-niń dıplomattyq korpýspen jumys jónindegi uıymynyń joldamasy qosymsha bolý kerek.
«Qujattardy tapsyrǵannan keıin, sizge ýaqytsha JK beriledi, ol berilgen kúninen bastap bir aı ishinde jaramdy bolady. Bul rette (eger suraý salýlar jiberý nemese olarǵa jaýaptar alý, júrgizýshi kýáligin joǵaltyp alýmen baılanysty barlyq jekelegen mán-jaılardy anyqtaý úshin qosymsha ýaqyt qajet bolsa) ony qosymsha taǵy bir ret otyz táýlikke uzartýǵa bolady, ony Tirkeý-emtıhan qabyldaý bólimi (TEB) bastyǵy júrgizedi»,-deıdi komıtet mamandary.
Kórsetilgen merzim aıaqtalǵan soń, jańa júrgizýshi kýáligi beriledi, oǵan «Joǵalǵannyń ornyna» degen belgi jasalady.
Joǵalǵan, urlanǵan, sondaı-aq jaramsyz bolyp qalǵan kýáliktiń ornyna basqa JK alý kezinde emtıhan tapsyrylmaıtynyn este saqtaý kerek! Bul joǵalǵan JK-nyń qoldanylý merzimi ótpegen jaǵdaıǵa qatysty. Eger joǵaltqan JK-nyń qoldanylý merzimi ótip ketse, onda Jol qozǵalysy erejesi boıynsha emtıhan tapsyrý arqyly biliktilikti rastaý kerek bolady. Sonymen qatar ýaqytsha JK joǵalǵan kezde jańa JK teorııalyq jáne tájirıbelik emtıhandar tapsyrýsyz beriledi.
Munymen qosa, JK shet memleketterdiń joǵalǵan júrgizýshi kýálikteriniń ornyna berilmeıdi.
Keıinnen tabylǵan JK jańa júrgizýshi kýáligi berilgen sátten bastap óziniń zańdyq kúshin joǵaltady jáne olar jol júrisi qaýipsizdigin qamtamasyz etý jónindegi ýákiletti organǵa belgilegen tártippen joıý úshin mindetti túrde TEB-ke tapsyrýǵa jatady.
