QR ІІM JSN-degi «qatelikterge» baılanysty túsinik berdi
NUR-SULTAN. QazAqparat - QR ІІM-niń Mıgratsııalyq qyzmet komıteti buqaralyq aqparat quraldarynda mekemeler men qyzmet kórsetý oryndarynyń jeke sáıkestendirý nómirindegi (JSN) qatelikke baılanysty tólem qabyldaýdan bas tartý máselesine baılanysty jaǵdaıdy túsindirdi. Bul týraly QR ІІM baspasóz qyzmeti habarlady.
BAQ-ta salyq qyzmeti, bankter men ózge de uıym, mekemeler tarapynan tólem qabyldaýdan jáne keıbir memlekettik qyzmetterdi kórsetýden bas tartyp otyrǵany týraly aqparat tarady. Munyń basty sebebi aqparat quraldarynyń habarlaýynsha, JSN-degi málimetter adamnyń týǵan kúnimen, nemese týǵan jylymen keıbireýinde tipti jynysymen sáıkes kelmeıdi.
«Biz óz tarapymyzdan mundaı áreketterdi zańsyz der edik. JSN týý týraly kýálik berilgen kezde avtomatty túrde qalyptasady (2009 jylǵa deıin ol jeke qujatty nemese jeke kýálikti daıyndaǵan kezde qalyptasatyn) jáne ol ózgermeý, teńdessizdik prıtsıpterine negizdelgen»,-delingen habarlamada.
Bul degenińiz Qazaqstannyń árbir azamatynyń óziniń jeke JSN-i bolady jáne ol ózge adamnyń JSN-imen sáıkes kelýi múmkin emes, sonymen qatar JSN bir ret beriledi de ol sol adamnyń ómiriniń sońyna deıin ózgermeıdi.
Bul jerde JSN-degi tsıfrlar tehnıkalyq turǵydan ǵana mańyzdy, eń mańyzdy másele onyń kody ekenin aıta ketý kerek. JSN quramyn tekserý úshin arnaıy 12 tsıfr oılastyrylǵan jáne ol arnaıy formýla arqyly oqylady. Sol sebepti bankter, emhanalar men ózge de mekemeler JSN-di tekserý qajet bolǵan jaǵdaıda osy 12 tsırlyq formýlany qoldanýlary kerek.
Ulttyq bankke, Densaýlyq saqtaý, Qarjy mınıstrlikterine, «Azamattarǵa arnalǵan úkimet» Memlekettik korporatsııasy sııaqty uıym, mekemelerge QR ІІM-gi tarapynan tıisti túsinikteme berildi.
Bankter qoldanatyn kompıýterlik baǵdarlamalarda JSN-di tekserý algorıtmi qaıta jasaldy. Endi ol azamattardyń jeke málimetterimen baılanystyrylǵan.
