QR ІІM jolaýshylar avtobýsy sýǵa batqan jolda bekettiń bolmaý sebebin anyqtaýda
ASTANA. QazAqparat - Aqmola oblysynyń Sandyqtaý aýdanynda jolaýshylar avtobýsy sýǵa batqan joldyń boıynda nelikten baqylaý beketi bolmaǵandyǵy tekserilip jatyr.
Bul jaıynda búgin Úkimettiń selektorlyq rejimdegi otyrysynan keıin QR Іshki ister mınıstri Qalmuhanbet Qasymov BAQ ókilderine málim etti.
Onyń atap ótýinshe, sý tasqyny jaǵdaılary bastalǵannan keıin elimizdiń barlyq qaýipti joldary boıynda baqylaý beketteri ornalastyryldy.
«Al ol jerde beket bolmaǵan. Biraq qasyndaǵy adamdar kómektesken, 10 balany qutqaryp, ata-analarynyń qolyna tabystaǵan. Biz ol jerde nelikten beket bolmaǵandyǵyn tekserip jatyrmyz», - dedi Qasymov.
Aıta keteıik, 16 sáýir kúni Atbasar qalasyna baǵyt alǵan «Paz» avtobýsy sý shaıyp ketken jolmen ótpek bolyp, jol shetindegi jyraǵa qulap ketti. Avtobýs ishinde 15 jolaýshy bolǵan. Onyń 10-y - balalar. Abyroı bolǵanda eshkim zardap shekken joq.
Sonymen qatar mınıstr qazirgi ýaqytta Jambyl, Almaty oblystary men Astanadan quqyq qorǵaý organdarynyń 3 myń adamy sý tasqyny qaýpi bar elimizdiń 5 oblysyna jiberilgendigin atap ótti.
«Bizdiń oıymyzsha 3-5 kúnnen keıin sý tasqyny qaýpi seıile bastaıdy. Tabıǵı apatpen kúresken qajetti qarjyny jergilikti ákimdikterdiń ózderi bólýde. Keıinirek jaǵdaıdy baǵalap ótinim beretin bolsa, onda respýblıkalyq bıýdjetten de qarjy qarastyrylady»,- dedi mınıstr.
Onyń paıymynsha, sý tasqyny qaýpiniń kúrt kúsheıýine bıyl qardyń shekti normadan 3 ese kóp túsýi, ótken aptanyń beısenbi, juma jáne senbi kúnderi jańbyr jaýyp, qardyń birden erýine túrtki bolý sebep.
