QR ІІM jol qozǵalysy erejesine engizilgen ózgertýlerdi túsindirdi
ASTANA. QazAqparat - Qazaqstanda júrgizýshi kýáliginiń merzimi ótip ketken jaǵdaıda ony aıyrbastaý úshin emtıhan tapsyrý alynyp tastaldy. Bul týraly búgin Ortalyq kommýnıkatsııalar qyzmetindegi brıfıngte QR ІІM Ákimshilik polıtsııa komıteti jol qozǵalysyn qamtamasyz etý salasyn úılestirý bóliminiń basshysy Nurseıit Ábishev málim etti.
Onyń aıtýynsha, Qazaqstan Respýblıkasynyń Ákimshilik quqyq buzýshylyq týraly kodeksine kólikti mas kúıde basqarǵany úshin múgedekterdi kólik quraldaryn basqarý quqyǵynan 3 jylǵa aıyrý túrindegi ákimshilik jaýapkershilik engizildi. Jol belgilerimen nemese joldyń júrý bóligindegi tańbalarmen kórsetilgen talaptardy saqtamaǵany úshin aıyppul mólsheri 5-ten bastap 3 aılyq eseptik kórsetkishke qysqartyldy. Masań kúıin kýálandyrýdan ótýden bas tartqan úshin júrgizýshi kýáliginen aıyrý merzimi 2 jyldan 3 jylǵa deıin kóbeıtildi. Іshki ister organdarynyń, áskerı polıtsııanyń qyzmetkeri toqtatqan jaǵdaıda onyń ruqsatynsyz jolaýshy kólik quralyn tastap ketken úshin jaýapkershilik alynyp tastalyndy.
«Jol júrisi týraly» Zańda túngi ýaqytta, saǵat 23-ten tańǵy 06 saǵatqa deıin qalaaralyq, aýdanaralyq qatynastarda avtobýstarmen turaqty emes tasymaldaýlar arqyly jolaýshylardy tasymaldaýǵa tyıym salý alynyp tastalyndy. Ákimshilik kedergilerdi tómendetý maqsatynda júrgizýshi kýáliginiń merzimi ótip ketken jaǵdaıda júrgizýshi kýáligin aıyrbastaý kezinde jol júrisi qaǵıdalaryn bilýin tekserý úshin emtıhan tapsyrý jónindegi mindettilik joıyldy», - dedi Ábishev.
Sonymen qatar onyń aıtýynsha, «Tm» sanatyndaǵy (tramvaı) kólik quraldaryn basqarý quqyǵyn alý úshin jasy tómendetildi (25 jastan 21 jasqa deıin) jáne basqa kólik quralyn basqarý tájirıbesi bar bolý qajettigi týraly talap alyndy.
«Zańnyń erejeleri 2017 jyldyń 15 shildesinen bastap qoldanysqa engiziledi», - dedi ol.
