QR ІІM jappaı tártipsizdikte urlanǵan qarý-jaraqty keri tapsyrýdy surady

NUR-SULTAN. QazAqparat – QR Іshki ister mınıstrligi Tergeý departamentiniń bastyǵy Sanjar Ádilov qańtar oqıǵasy kezinde urlanǵan qarýdy izdeý jáne tárkileý jumystary týraly aıtyp berdi, dep habarlaıdy QazAqparat.

«Urlanǵan qarýdy izdeý jáne alý boıynsha maqsatty jedel-izdestirý is-sharalary jalǵasýda. Qazirgi ýaqytta jalpy sany 1069 dana qarý alyndy, onyń ishinde 123 avtomat, 231 tapansha, 263 tegis uńǵyly myltyq, 84 birlik kesilgen qarý, 168 granata, 9 granatomet pen 2 pýlemet. Odan basqa 21759 oq-dári tabyldy jáne alyndy», - dedi S. Ádilov Ortalyq kommýnıkatsııalar qyzmetinde ótken brıfıngte.

QR ІІM ókili túsindirý jumysynan keıin turǵyndar 100-den artyq qarýdy óz erkimen tapsyrǵanyn atap ótti.

«Osyǵan baılanysty azamattardy kúdikti adamdar, atys jáne sýyq qarýdy zańsyz saqtaý men satý týraly belgili aqparatty polıtsııaǵa habarlaýdy taǵy da suraımyz. Qylmystyq elementter zańsyz aınalymǵa túsken qarýdy kez kelgen ýaqytta beıbit azamattarǵa qarsy qoldana alady», - dedi Sanjar Ádilov.

Aıta keteıik, atys qarýyn, oq-dáriler men jarylǵysh zattardy saqtaǵandar olardy erikti túrde tapsyrsa jáne áreketterinde basqa qylmys quramy bolmasa, qylmystyq jaýapkerishilikten bosatylady.

Qazirgi ýaqytta Іshki ister organdarynyń tergeýshileri qańtar oqıǵasyna qatysty 2997 qylmystyq isti tergep jatyr.