QR ІІM janyndaǵy Qoǵamdyq Keńeste sybaılas jemqorlyqpen kúres máselesi talqylandy
ASTANA. QazAqparat - QR Іshki ister mınıstrliginde Qoǵamdyq Keńestiń músheleri - belgili qoǵam qaıratkerleriniń, depýtattyq korpýs, buqaralyq aqparat quraldarynyń, úkimettik emes jáne ǵylymı uıymdar ókilderiniń, sondaı-aq ІІM-niń basshy quramynyń qatysýymen kezekti otyrys bolyp ótti, dep habarlady ІІM baspasóz qyzmetinen.
Keńeste «Nur Otan» partııasynyń 2015-2025 jyldarǵa arnalǵan sybaılas jemqorlyqqa qarsy is-qımyl jónindegi baǵdarlamasyn iske asyrý sheńberinde ishki ister organdaryndaǵy sybaılas jemqorlyq qubylystaryn aldyn alý boıynsha qabyldanyp jatqan sharalar týraly másele qaraldy.
Sonymen qatar otyrysta Qoǵamdyq keńestiń 2015 jyly alda turǵan jumysy jáne Keńes músheleriniń turaqty jumys kezdesýlerin ótkizý jónindegi usynystar talqylandy. ІІM Qoǵamdyq Keńesiniń tóraǵasy Marat Qoǵamov ishki ister organdarynyń kúndelikti qyzmeti jarııaly túrde júrgizilýi jáne polıtsııanyń árbir qyzmetkeriniń zańdylyq normalaryn qatań saqtaýyna negizdelýi tıis ekenin atap kórsetti. Sondyqtan ishki ister organdary bólinisteriniń basshylary ózderiniń qaramaǵyndaǵy qyzmetkerlerdiń ústinen túsken azamattardyń shaǵymdaryn basty nazarǵa alýy kerek. Keńes otyrysynyń qorytyndysy boıynsha ishki ister organdarynyń sybaılas jemqorlyqqa qarsy kúres boıynsha qosymsha sharalar qabyldaý, polıtsııa qyzmetkerleriniń arasynda quqyq buzýshylyqtardy boldyrmaý jáne aldyn alý qajettiligi atap kórsetildi.
