QR ІІM zańsyz saqtaýdaǵy qarýdy satyp alý aktsııasyn onlaın ótkizedi
NUR-SULTAN. QazAqparat - 1 shildeden bastap respýblıka aýmaǵynda halyqtan zańsyz saqtalǵan atys qarýyn, oq-dáriler men jarylǵysh zattardy satyp alý boıynsha jyl saıynǵy aktsııa bastalady. QazAqparat bul týraly Polisia.kz saıtyna silteme jasap habarlaıdy.
«Qarý-jaraq zattaryn erikti túrde tapsyrǵany úshin qarýdyń ár birligine onyń tehnıkalyq jaı-kúıine baılanysty komıssııa sheshimimen 10-nan 100 AEK-ke deıingi tólem kózdelgen. Syıaqy tólemi qarý-jaraq zattaryn tapsyrǵan adamdardyń shotyna aýdarý arqyly júzege asyrylatyn bolady. Tirkelmegen atys qarýyn, oq-dárilerdi jáne jarylǵysh zattardy erikti túrde tapsyrǵan adamdar qylmystyq jáne ákimshilik jaýapkershikke tartylýdan bosatylady», - delingen aqparatta.
Elde epıdemıologııalyq ahýaldyń kúrdelenýine baılanysty qarý-jaraqty erikti túrde tapsyrý úshin polıtsııa organdaryna barýdyń qajeti joq. Azamattar Polıtsııa departamentteriniń saıtynda kórsetilgen «qaýyrt jeli» telefondaryna nemese «102» nomerine habarlassa jetkilikti.
Qarýdy ishki ister organdarynyń qyzmetkerleri ótinish berýshiniń mekenjaıyna baryp qabyldap alatyn bolady.
«Buryn qabyldap alý aýmaqtyq polıtsııa organdarynda júrgizilgen bolatyn. Jarylǵysh materıaldar men oq-dárilerdi taýyp alǵan jaǵdaıda olarmen qandaı da bir is-áreket jasamaı, tek polıtsııa bólimshesiniń kórsetilgen telefon nómirlerine habarlaý qajet», - dedi polıtsııadan.
Halyqtan zańsyz saqtaýdaǵy atys qarýlaryn, oq-dáriler men jarylǵysh zattardy satyp alý boıynsha aktsııalar 2012 jyldan beri ótkizilip keledi. Búginge deıin 51 myńnan astam qarý jáne ıir oıyqty qarýdyń 2 mln patrony satyp alyndy. Bul rette, atys qarýyn qoldana otyryp jasalatyn qylmystar úsh esege (2012j. 694-ten 2019j. 238-ge deıin) tómendegen.
