QR ІІM zańsyz mıtıngterdiń vıdeosyn jarııalady

NUR-SULTAN. QazAqparat - Nur-Sultan jáne Almaty qalalarynda zańsyz mıtıngter uıymdastyrý áreketteri tirkeldi. Prokýratýranyń birneshe ret eskertkenine qaramastan, keıbir azamattar tyıym salynǵan ekstremıstik uıymnyń arandatýshylyqtaryna erdi. Bul týraly QR Іshki ister mınıstrliginiń baspasóz qyzmetinen málim etti, dep habarlaıdy QazAqparat.

«Quqyq qorǵaýshy qyzmetkerlerge qatysty zańǵa qaıshy áreketter jasalyp, basqa azamattardyń tynyshtyǵy men qaýipsizdigine qater tóndirdi. Kólik qozǵalysyna tosqaýyl qoıý áreketi boldy», - delingen habarlamada.

Osyǵan baılanysty ishki ister organdary qoǵamdyq tártipti buzýdy aldyn alý boıynsha sharalardy qabyldady.

«Tártip buzýshylardy ustaý barynsha saýatty júrgizildi, arnaıy quraldar qoldanylǵan joq. Zańsyz aktsııany uıymdastyrý jáne qatysqany úshin polıtsııaǵa júzden astam adam jetkizildi. Keıbireýinen tútindegish quty jáne travmatıkalyq qarý tárkilendi. Olardyń 44-i ákimshilik jaýapkershilikke tartyldy, onyń ishinde ákimshilik qamaýǵa alý men aıyppul eskerilgen. Qalǵandarymen túsindirý jumystary júrgizilip, olar úılerine jiberildi», - dep atap ótilgen QR ІІM málimetinde.

Sondaı-aq, Іshki ister organdary qoǵamdyq tártipti buzý áreketterine jol bermeıtindigin, zańnamaǵa sáıkes azamattar tynyshtyǵy men qaýipsizdigin qorǵaý boıynsha sharalardy qabyldaıtyndyǵyn jetkizdi.

Eske salsaq, 6 shilde kúni Nur-Sultan men Almatyda zańsyz sherý ótkizýge áreket jasalǵandyǵy týraly habarlaǵan bolatynbyz.