QR ІІM vıtse-mınıstri BUU-nyń ókilderimen júzdesti

ASTANA. QazAqparat - Іshki ister mınıstriniń orynbasary Berik Bısenqulov BUU-nyń Adam quqyqtary boıynsha komıtetiniń múshesi Kote Vardjelashvılımen jáne Azamattyq jáne saıası quqyqtar jónindegi ortalyq dırektory Patrık Matzenbergpen (Shveıtsarııa, Jeneva q.) kezdesti, dep habarlaıdy QR Іshki ister mınıstrliginiń baspasóz qyzmeti.

Kezdesýde BUU-nyń Adam quqyqtary boıynsha komıtetiniń Qazaqstannyń Azamattyq jáne saıası quqyqtar týraly halyqaralyq paktiniń talaptaryn oryndaýy týraly ekinshi merzimdi baıandamasynyń nátıjelerin qarastyrý boıynsha berilgen usynymdarynyń ımplementatsııasynyń barysy talqylandy.

Іshki ister mınıstriniń orynbasary azamattardyń quqyqtary men zańdy múddelerin qorǵaý boıynsha ІІM qyzmetiniń negizgi aspektilerine toqtalyp ótti jáne adam quqyqtaryn saqtaý qaǵıdalarynyń buljymastyǵyn rastady.

Mınıstrdiń orynbasary Qazaqstandaǵy bas bostandyǵynan aıyrý oryndaryna halyqaralyq jáne quqyq qorǵaýshy uıymdardyń emin-erkin baratynyn atap ótti.

Jyl ishinde mekemelerdegi jazasyn óteýshiler sanynyń úshten bir bólikke azaıyp, nátıjesinde 8 mekeme jabylǵandyǵy aıtyldy.

«Qamaýdaǵylardyń tamaqtaný normalary men turatyn aýmaǵy keńeıdi, sottalǵandardy medıtsınalyq qamtamasyz etý jaqsardy, kolonııalardaǵy quqyqtyq tártip kúsheıdi. Mekeme ákimshiligine shaǵym segiz esege azaıdy",-dedi mınıstrlik ókilderi. 

Sharaǵa qatysqan ІІM Qylmystyq-atqarý júıesi komıtetiniń, ózindik qaýipsizdik, tergeý jáne krımınaldy polıtsııa departamentteriniń basshylary qonaqtardy azamattardyń quqyǵyn qorǵaý, sottalǵandardyń qylmysyn ashý, tergeý jáne olardy ustaý barysynda oryn alatyn azaptaýǵa qarsy jumystar jóninde habarlandyrdy.