QR ІІM TJK-niń qutqarýshylary bir apta ishinde qar qursaýynan 901 adamdy shyǵardy
ASTANA. QazAqparat - QR ІІM Tótenshe jaǵdaılar komıtetiniń aýmaqtyq bólimsheleriniń kúshteri jol qyzmetterimen birlese otyryp, 2015 jylǵy 9-15 naýryz aralyǵyndaǵy kezeńde elimizdiń avtomobıl joldarynda belsendi túrde jumys júrgizdi. Bul týraly atalǵan vedomstvodan habarlady.
Kóbinese qar qursaýynda qalǵan adamdardy Soltústik Qazaqstan oblysynyń qutqarýshylary evakýatsııalady. Jambyl, Aıyrtaý, Aqjar, Taıynsha, Tımırıazev, Aqqaıyń, Esil, Ýálıhanov aýdandarynda, Ǵ. Músirepov atyndaǵy aýdanda 376 adam jáne 151 birlik tehnıka qutqaryldy.
Qaraǵandy oblysynyń qutqarýshylary qar qursaýynan 238 adamdy, onyń ishinde 10 balany, 66 birlik tehnıkany qutqardy. Qutqarý jumystary Temirtaý, Jezqazǵan qalalarynda, Osakarov, Abaı, Nura, Shet, Buqar jyraý, Ulytaý aýdandarynda júrgizildi.
Budan bólek, 218 adam, onyń ishinde 18 bala jáne 87 birlik tehnıka Aqmola oblysynda evakýatsııalandy. Qutqarý qyzmetteri Kókshetaý, Stepnogorsk qalalarynda, sondaı-aq Sandyqtaý, Jaqsy, Tselınograd, Bulandy, Zerendi, Aqkól, Býrabaı aýdandarynda jumys jasady.
Qutqarý jumystary nátıjesinde Pavlodar oblysy Jelezınsk aýdanynyń «Pavlodar-Krasnoarmeıka» avtojolynda 30 adam, onyń ishinde 5 bala qutqaryldy. 11 birlik tehnıka evakýatsııalandy.
Sonymen qatar Qostanaı oblysynyń Amangeldi, Qarasý aýdandarynda qutqarýshylar 20 adam men 5 birlik tehnıkany qutqardy
«Júrgizilgen qutqarý jumystary nátıjesinde barlyǵy qar qursaýynan 901 adam, onyń ishinde 35 bala jáne 319 birlik tehnıka qutqaryldy. Azamattarǵa aýa raıynyń qolaısyz jaǵdaılarynda eldi mekenderden tys jerlerge, ásirese, túnde jáne aýa raıy buzylǵanda shyqpaý jaıly taǵy da eskertkimiz keledi», - delingen komıtet málimetinde.
