QR ІІM Tursynbaı Bóribaıǵa Qytaıdaǵy súıiktisimen qosylýdyń jolyn kórsetti
ASTANA. QazAqparat - QR Іshki ister mınıstrligi Memlekettik til jáne aqparat departamentiniń dırektory Almas Sadýbaev qazaqstandyq Tursynbaı Bóribaıǵa Qytaıdaǵy súıiktisimen qosylýdyń jolyn aıtty, dep habarlaıdy QazAqparat.
«Tursynbaı Bóribaıdyń bolashaq jubaıynyń elden shyǵarylýyna jáne kelýine shekteý qoıylýyna baılanysty mynany habarlaımyz: ol Qazaqstan Respýblıkasyna ótken jyldyń 7 maýsymynda keldi jáne ýaqytsha tirkeýge (5 táýliktiń ishinde) turǵan joq, tirkelýge 2016 jyldyń 22 maýsymynda keldi. Osy fakti boıynsha ol QR ÁQBK 512-baby 2-tarmaǵy (Sheteldiktiń nemese azamattyǵy joq adamnyń tirkeý úshin Qazaqstan Respýblıkasynyń zańnamasynda belgilengen kúntizbelik bes kún ótkennen keıin úsh táýlikke deıingi merzimde ishki ister organdarynda tirkeýge turmaýy) boıynsha ákimshilik jaýapkershilikke tartyldy. Taldyqorǵan aýdanaralyq ákimshilik soty Qazaqstan sheginen shyǵarý túrindegi jaza belgiledi. Sot sheshiminiń negizinde mıgratsııalyq qyzmet Biryńǵaı aqparattyq júıege elge kelýge (2016 jyldyń 29 maýsymynan 2021 jyldyń 29 maýsymyna deıin) shekteý engizdi», - dedi Almas Sadýbaev.
Onyń aıtýynsha, «Halyqtyń kóshi-qony týraly» QR Zańynyń 48 babyna sáıkes buryn Qazaqstan Respýblıkasynan shyǵaryp jiberilgen kóship kelýshilerge shyǵaryp jiberý týraly sheshim shyǵarylǵan kúnnen bastap bes jyl boıy Qazaqstan Respýblıkasyna kelýge tyıym salynady.
«Taldyqorǵan aýdanaralyq ákimshilik sotynyń sheshimine shaǵymdanyp jáne sheshim ózgergen jaǵdaıda mıgratsııalyq qyzmet Qazaqstanǵa kelýge tyıymdy alyp tastaıdy», - dedi ol.
Aıta keterligi, Abaı.kz saıtynda Tursynbaı Bóribaı esimdi azamattyń elimizdiń Іshki ister mınıstri, Polıtsııa general-leıtenanty Qalmuhanbet Qasymovqa jazǵan haty jarııa etilgen bolatyn.
Onda ol 2015 jyly Taldyqorǵan qalasynda QHR-dyń azamaty Imanáli Jazıra atty qyzben tanysyp, aldaǵy kúnderde otbasyn qurýǵa ýaǵdalasqanyn atap ótken. Ókinishke oraı, bolashaq jary Imanáli Jazıra 2016 jyly 7 maýsymda QR «Ákimshilik quqyq buzýshylyq týraly» Kodeksiniń 517-babynyń 2-bóligimen kináli dep tanylyp, Qazaqstan Respýblıkasynyń sheginen ákimshilik jolmen shyǵarylyp jiberilgen.
«Mine, sodan beri bir jyl ótti. Endi tórt jyly bar. Sóz bergen soń, jigit adam ýádesinde turý kerek! Jaqynda QHR-ǵa baryp, Imanáli Jazıramen zańdy nekege turyp keldim. Shynymdy aıtsam, tórt jyl tosý men úshin ońaıǵa soǵyp turǵan joq. Beıbit kúnde eski zamannyń qatal zańyna ushyraǵan ǵashyqtardyń kúıin keshý qıyn eken, Qalmuhanbet aǵataı! Onyń ústine, úıdegi uldyń kenjesi edim. Ákem Nursapa Tursyn mıyna qan quıylyp, aýyryp jatyr. Meniń toıymdy jasap, qyzyǵymdy kórip ketsem dep kúnde armandaıdy. Halqymyzda «Eki jasty qosqan alǵys alady, eki jasty aıyrǵan qarǵys alady!» degen ataly sóz baryn jaqsy bilesiz», - deı kele osy máseleni sheshýge kómek suraǵan bolatyn.
