QR ІІM turmystyq zorlyq-zombylyq úshin jaýapkershilikti kúsheıtýdi usyndy

ASTANA. QazAqparat – QR ІІM Ákimshilik polıtsııa komıteti basqarma bastyǵynyń orynbasary Jasulan Jumanalın áıelderdi zorlyq-zombylyqtan qorǵaý sharalary týraly aıtyp berdi, dep habarlaıdy QazAqparat tilshisi.

Onyń aıtýynsha, Іshki ister mınıstrliginde áıelder men balalardy zorlyq-zombylyqtan qorǵaý jónindegi arnaıy bólimshe quryldy. Ótken jyldan bastap mundaı laýazymdar árbir aýdandyq polıtsııa bólimshesinde engizildi.

«Bul qyzmetkerler ótinishterdi qabyldaıdy, jábirlenýshilerge quqyqtyq jáne psıhologııalyq kómek kórsetedi, daǵdarys ortalyqtarymen jáne úkimettik emes uıymdarmen belsendi jumys isteıdi. Oǵan qosa, barlyq polıtsııa departamentterinde turaqty jumys isteıtin jedel-tergeý toptary quryldy, olardyń quramyna 280 áıel-tergeýshi kirdi. Áıel tergeýshilerdiń qylmystyq isterdi tergeýi senim faktoryn qoldanýǵa jáne tergeý áreketterin sapaly júrgizýge múmkindik beredi», - dedi J. Jumanalın mınıstrlik uıymdastyrǵan onlaın brıfıngte.

Sonymen birge, mınıstrlik turmystyq zorlyq-zombylyq úshin jaýapkershilikti kúsheıtý boıynsha zańnamalyq túzetýler ázirledi.

«Taraptardyń tatýlasý rásimine qoıylatyn talaptar kúsheıtiledi. Biz tek sotta tatýlasýǵa múmkindik berýdi usynamyz. Otbasylyq-turmystyq saladaǵy quqyqbuzýshylyqtar úshin jaýapkershilik qatańdaıdy. ÁQBtK sheńberinde qaıta qylmys jasaǵany úshin ákimshilik qamaýǵa alý merzimderin ulǵaıtý usynylady», - dedi spıker.

Oǵan qosa, densaýlyqqa zııan keltirýge baılanysty qylmystar quramyna «otbasylyq-turmystyq qatynastardaǵy adamǵa qatysty» biliktilik belgisin engizý kózdelgen.