QR ІІM: Túrkistan oblysynda jaǵdaı turaqtandy
TÚRKІSTAN. QazAqparat - Jaýyn-shashynnyń mol jaýýy saldarynan turǵyn úılerdi, aýla aýmaqtaryn sý basqan jáne avtomobıl kópirlerin sý shaıǵan Túrkistan oblysynyń eldi mekenderinen sý soryp shyǵaryldy. Jaǵdaı turaqtandy. Evakýatsııalanǵan adamdar óz úılerine oralýda.
Bul týraly QR Tótenshe jaǵdaılar komıtetiniń baspasóz qyzmeti
Qazirgi ýaqytta Leńgir aýdanynda avarııalyq-qutqarý jumystary júrgizilýde. Qutqarýshylar men jergilikti atqarýshy organdar sýdy soryp shyǵarý jáne aryqtardy, kóshelerdi tazalaý jumystaryn júrgizýde. Materıaldyq zalaldy baǵalaý úshin aýlalardy aralaý jumystary júrgizilýde.
Tótenshe jaǵdaıdyń saldaryn joıýǵa Tótenshe jaǵdaılar departamentiniń jeke quramynan 52 adam, 27 motopompa jáne 15 birlik tehnıka men jergilikti atqarýshy organdardyń quramynan 241 adam men 33 birlik tehnıka jumyldyryldy.
Maqtaaral aýdanynda Nurlyjol, Ferdoýsı, Órgebas, Dostyq jáne Jeńis eldi mekenderinde 1030 úı sý astynda qaldy. Qorǵaý bógetterin turǵyzý, sý basqan aýmaqtardan sýdy soryp shyǵarý jáne halyqtyń múlkin evakýatsııalaý jumystary jalǵasýda.
Búgingi kúni 6,2 mln. astam tekshe metr sý soryldy. Jalpy uzyndyǵy 22 shaqyrym ýaqytsha bógetter salyndy, 87 000-nan astam qap tóseldi jáne sý burý úshin 3 kollektor ornatyldy.
«Órgebas aýylynda júrgizilgen jumystardyń nátıjesinde avtokólik qozǵalysy úshin ishki avtojoldar ashyldy. Sondaı-aq óńirde sý tasqynynan zardap shekken halyqqa medıtsınalyq jáne psıhologııalyq kómek kórsetý jumystaryn júrgizýde. Táýlik boıy ІІM, Qorǵanys mınıstrigi, Tótenshe jaǵdaılar qyzmetiniń 1626 qyzmetkeri men 324 birlik tehnıka, 17 júzý quraly, 217 motopompa jumysyn jalǵastyrýda»,-delingen QR ІІM Tótenshe jaǵdaılar komıtetiniń málimetinde.
